Alimxodjayeva Paraxat Rustamovna, 5 - may, 1943 yilda Toshkent viloyatida tug‘ilgan. Toshkent Tibbiyot akademiyasi tibbiy biologiya va gistologiya kafedrasi professori, biologiya fanlari doktori.
Toshkent davlat meditsina institutining davolash fakultetini imtiyozli tugatgan Paraxat Alimxodjayevaning oldida ikkita yo‘l turardi. Biri - tug‘ilib o‘sgan qishlog‘iga borib shifokorlik qilish, ikkinchisi ustozlari ko‘rsatgan yo‘l - institutda qolib, ilmiy ish qilish.
Qizim, - dedi otasi Rustam aka, - institutni a’loga tugatding, diplom rahbaring nihoyatda bilimli qiz, sohasi rivojiga hissa qo‘sha oladigan iqtidorli olima bo‘ladi, dedi. Demak, seni o‘rning shu yerda qolib, ustozlaring ishonchini oqlash. Bizni yuzimizni yorug‘ qilish.
Bu ishonch Paraxatning dilidagi shubhalarni tumanday tarqatib yubordi. O‘ziga bo‘lgan ishonchini kuchaytirdi. U Tibbiyot, biologiya va genetika kafedrasida assistent lavozimida ishga qoldi. Yana qaytadan o‘qishni boshladi. Tibbiyot ilmi cheksiz ummonligini, u nihoyatda jiddiy fanligini, bu fan tabiatning eng ardoqlisi bo‘lgan insonga xizmat qilishini dil - dilidan anglagach esa tanlagan kasbidan faxrlandi. Inson sog‘lig‘i salomatligi daxlsizligi uchun murakkab tajribalarga bardosh berayotgan jonivorlarga nisbatan qalbida bir iliqlik tuydi.
1972 yilda “Qushlardagi qon va qon hosil qilish azolarining fasllarda va radiatsiya ta’siridagi ko‘rinishi” mavzusidagi nomzodlik dissertatsiyasini yoqladi. Talabalar orasida dono va talabchan ustoz sifatida hurmat qozondi.
1985 yilda Paraxat Rustamovnaga katta o‘qituvchi, 1988 yilda esa dotsent ilmiy unvoni berildi. 1966 yildan 2005 yilgacha kafedrani boshqardi. 1 dekabr 2005 yildan boshlab to shu kungacha ToshTA Gistologiya va tibbiy biologiya kafedrasining professori lavozimida ishlab kelmoqda.
2002 yilda “Umurtqali hayvonlarning immun tizimi a’zolarini onta - filogenezda va gidrokortizon ta’siridagi sitofunksional tahlili” mavzusida doktorlik dissertatsiyasini muvaffaqiyatli himoya qildi.
Olima Paraxat Rustamovna respublikamizda dolzarb bo‘lgan umurtqali hayvonlarning immun tizimi azolarining onto - filogenezda hamda gidrokartizon ta’sirida o‘rganib, amaliyotda muhim bo‘lgan jarayonlarni aniqladi.
Ko‘p yillik pedagogik ish faoliyatida tibbiyot instituti va kollejlari talabalari uchun 10 ta darslik yozdi. Tibbiyot, biologiya va genetikadan talabalar uchun 34 ta o‘quv uslubiy qo‘llanma, rus va o‘zbek tillaridagi ma’ruza matnlarni nashr qildi.
2008 yilda O‘zbekiston Respublikasi Oliy va o‘rta maxsus talim vazirligi va “Istedod” jamg‘armasi tomonidan o‘tkazilgan “Yilning eng yaxshi darsligi va o‘quv adabiyoti muallifi” respublika tanlovida P. Alimxodjaeva yaratgan “Tibbiy genetika” darsligi III darajali, 2009 yildagi xuddi shu tanlovda esa “Meditsinskaya biologiya i genetika” darsligi II darajali diplom bilan taqdirlandi.
U rahbarlik qilayotgan kafedrada o‘quv uslubiy ishlar ilmiy tadqiqot ishlari bilan uzviylikda amalga oshirilmoqda. Bu ilmiy ishlar natijalari o‘laroq 100 dan ortiq ilmiy maqolalar chop etildi. Paraxat Rustamovna tibbiy genetika bo‘yicha magistrlar direktori. U bu yerda malaka oshirayotgan tibbiyot institutlarining professor - o‘qituvchilariga tibbiy genetika fanidan ma’ruzalar o‘qiydi. Ularning savollariga misollar asosida atroflicha, batafsil javob berishga harakat qiladi.
Olima bir on ham izlanishdan to‘xtagani yo‘q. U kafedraning ilmiy - uslubiy, ilmiy tadqiqot ishlarini to‘liq bajarilishida bosh - qosh. Ustoz tibbiy biologiya fani bo‘yicha reyting tizimini ko‘rib chiqdi, test nazoratini, 091 usulida oraliq va yakuniy nazorat o‘tkazishni joriy qildi.
Professor Paraxat Rustamovna fakultet va akademiyaning jamoat ishlarida faol. O‘zbekiston Fanlar akademiyasi Bioximiya instituti qoshidagi D.015.16.01. “Bioximiya va hujayra biologiyasi” da doktorlik dissertatsiyalarni himoya qilishga ixtisoslashgan kengashning, hamda Toshkent tibbiyot akademiyasi ilmiy kengashi, tibbiyot - biologik kafedralari kengashi a’zosi.
Atoqli olima, tajribali pedagog Alimxo‘jayeva bugungi kunda ham qizg‘in ijodiy mehnat quchog‘ida. Tibbiyot akademiyasi o‘quv - uslubiy va ilmiy muammolar hay’ati a’zosi, tibbiyot biologiya va genetika fanining monomotik hay’ati raisi, tibbiy pedagogika fakulteti ilmiy kengashi a’zosi Paraxatxonimning bir zum ham bo‘sh vaqti yo‘q. Hamisha yangi - yangi rejalar tuzib, ertaga umid va ishonch bilan intilib yashaydi. Bazi muammolarni hal qilishda esa ikki yonida turgan farzandlari, onasi izdoshlariga aylanib ulgurgan tibbiyot fanlari nomzodlari yordamga keladi. Oilasidan ham, jamoasidan ham omadi chopgan baxtli olimamizga biz ham, mana shu g‘ayrat va ishtiyoq sizni hech qachon tark etmasin, deymiz.
