Andreyev Mixail Stepanovich

Andreyev Mixail Stepanovich (1873.11.9, Toshkent - 1948.10.11) - etnograf, tilshunos, eronshunos olim. Oʻzbekiston FA akademigi (1943), Rossiya FA muxbir aʼzosi (1929), Oʻzbekiston va Tojikistonda xizmat koʻrsatgan fan arbobi (1945, 1944), Toshkent gimnaziyasini, Turkiston oʻqituvchilar seminariyasini tugatgan. Toshkentdagi Eshonquli dodho madrasasida oʻqigan (1894). 1897 yil Moʻgʻuliston va Sharqiy Turkiston ekspeditsiyalarida ishtirok etadi. 1918-1920 yillarda Turkiston sharqshunoslik instituti, keyinroq Oʻrta Osiyo davlat universitetida sharqshunoslik fakulteti dekani. 1927-1947 yillarda dotsent, soʻngra professor. Oʻzbekiston FA Tarix va arxeologiya institutida etnografiya boʻlimini boshqargan (1944-1948). U Oʻrta Osiyo miqyosida oʻtkazilgan bir qancha etnografik ekspeditsiyalarga rahbarlik qilgan. Asosiy ilmiy asarlarida Turkiston xalqlarining urf-odati, eʼtiqodi, sanʼati va dini yoritilgan. Sharqiy Eron tillarining tasnifiga oid asarlari ham bor.