Xalqaro Antigue Word ilmiy akademiyasining akademigi, tarix fanlari doktori, A.Qodiriy nomidagi Jizzax davlat pedagogika instituti professori, O‘zbekiston Respublikasi Xalq ta’limi a’lochisi Faniya Avzalovna Axmedshina 1939 yil 29 sentyabrida Boshqirdistonning Chekmagush tumanida ziyoli oilasida tavallud topdi, U taniqli olim, professor Y. N Alekserov rahbarligida O‘zbekiston va Ozarbayjon iqtisodiy madaniy aloqalari tarixi mavzusidagi ilmiy ishini yozishga kirishdi. Bu davrda yosh olima ikki turkiy respublika - O‘zbekiston va Ozarbayjonning qardoshlik, birodarlik tarixi, iqtisodiy, ilmiy - madaniy aloqalariga bag‘ishlangan o‘nlab maqolalar yozdi. 1967 yilda Faniya Avzalovna Axmedshina SAMDU qoshidagi ilmiy kengashda nomzodlik dissertatsiyasini muvaffaqiyatli himoya qildi. Ishga Ozarbayjon opponentlari va O‘zbekiston olimlari yuqori baho berdilar. O‘sha paytda SamDU rektori bo‘lgan akademik V. A. Abdullayev yosh tadqiqotchiga ilmiy izlanishlarida oq yo‘l tiladi.
Olima 1967 - 1995 yillarda Ozarbayjon Fanlar akademiyasi tarix institutida ilmiy faoliyat olib boradi. Ana shu o‘ttiz yil davomida olima turli xalqaro simpoizum, konfrensiya va seminarlarda faol ishtirok etdi.
Ozarbayjon FA Tarix institutining fundamental tadqiqotlarida ishtirok etdi, monografiya va tadqiqotlarda hammuallif bo‘ldi. 1991 yil Faniya Avzalovna doktorlik dissertatsiyasini himoya qildi. Shu yildan boshlab u yangi tashkil etilgan Xazar universitetining professori vazifasida talabalarga ma’ruzalar o‘qiy boshladi, ilmiy faoliyatini pedagogik amaliyot bilan bog‘lab davom ettirdi.
1995 yil Faniya Avzalovna turmush o‘rtog‘i, dotsent Dadash Bagishev va farzandlari bilan Jizzax shahriga ko‘chib keldi. Shu yildan boshlab Faniya Avzalovna Jizzax pedagogika instituti “Umumiy tarix” kafedrasining professori, dotsent Bagishev Dadash Hasan o‘g‘li ingliz tili kafedrasining mudiri lavozimida faoliyat ko‘rsata boshlaydilar.
Professor Axmedshina Faniya Avzalovna tez orada bilimdon olim, tajribali pedagog va tashkilotchi xodim sifatida tanildi. U respublika, viloyat va shahar xotin - qizlari tashkilotlarida maslahatgo‘y, ishbilarmon ayollar qo‘mitasida faol qatnashchi sifatida tanildi.
Ayni paytda professor F. A. Axmedshina yosh ilm ahillariga “Qadimgi dunyo tarixi” , “Tarix fani metodologiyasi”, “Jahon sivilizatsiyalari tarixi” fanlaridan ma’ruzalar o‘qiydi. “Gender asoslari: nazariya va amaliyot” mavzusida mualliflik dasturi asosida maxsus kurs olib boradi. U rahbarlik qilayotgan iqtidorli talabalardan uch nafari Navoiy nomli davlat stipendiyasi sovrindori bo‘ldi. Olima rahbarligida iqtidorli talabalarning to‘rtta ilmiy ishlari nashr qilindi. Domlaning shogirdlari hozirda AQSh, Germaniya, Avstriya,Yaponiya va Fransiya mamlakatlarida magistraturada ta’lim olmoqda .
Professor Axmedshina Faniya Avzalovna keyingi yillarda ham O‘zbekiston xalqlari tarixi, qadimgi dunyo tarixi va jamiyat taraqqiyotida Gender tengligi muammolariga bag‘ishlangan tadqiqotlari yo‘nalishida 6 ta qo‘llanma, 30 dan ortiq ilmiy maqolalar e’lon qildi.
Shuningdek , olima xalqaro simpoizumlarda, respublika ilmiy - amaliy konfrensiyalarida, respublika ilmiy - amaliy konfrensiyalarida, seminarlarda ma’ruzalari bilan faol ishtirok etib kelmoqda. Olimaning ilmiy va pedagogik faoliyati hukumatimiz tomonidan taqdirlangan. Uning xizmatlari O‘zbekiston Respublikasi Xalq ta’limi vazirligi, Jizzax viloyat hokimligi, institut rahbariyati tomonidan faxriy yorliqlar, Xalq ta’limi a’lochisi nishoni bilan taqdirlandi.
