Fizika - matematika fanlari nomzodi, professor
1930 yilda Farg‘ona viloyatining O‘zbekiston tumanida tavallud topgan. Uning yoshligi Ikkinchi jahon urushining og‘ir davriga to‘g‘ri keldi. U o‘qish bilan birgalikda jamoa xo‘jaligida mehnat qildi. Maktabni tamomlagandan so‘ng ham oilani boqish uchun bir necha yil ishlashiga to‘g‘ri keldi. Nihoyat, 1950 yilda Farg‘ona davlat pedagogika institutining matematika fakultetiga o‘qishga kirib, 1954 yilda tamomladi. Uch yil maktabda ishlagach,1957 - 1960 yillarda O‘zR FA Romanovskiy nomli Matematika institutida I. S. Arjaniyx rahbarligida aspiranturada o‘qidi va 1962 yilda “Giperbolik tipdagi tenglamalar sistemasi uchun aralash masalalar” mavzusida nomzodlik dissertatsiyasini yoqladi. Shu muammo bo‘yicha 40 dan ortiq ilmiy maqola va bir monografiya elon qildi.
Q. Boyqo‘ziyev faoliyatining chorak asri Farg‘ona davlat pedagogika instituti bilan bog‘langan. U 1963 - 1971 yillarda matematika fakulteta dekani va kafedra mudiri lavozimlarida, 1971 - 1974 yillarda esa o‘quv ishlari bo‘yicha prorektor lavozimida ishladi. 1974 yilda Muqimiy nomli Qo‘qon davlat pedagogika instituta rektorligiga tayinlandi va bu lavozimda 1989 yilgacha mehnat qildi. So‘ngra hayotining oxirigacha Qo‘qon davlat pedagogika institutining oliy matematika kafedrasida professor bo‘lib faoliyat ko‘rsatdi.
Q.Boyqo‘ziyev o‘zbek tilida nashr qilingan “Differentsial tenglamalar” (Toshkent, “O‘qituvchi”, 1983) nomli o‘quv qo‘llanmaning muallifidir.
U katta pedagogik tajribaga ega bo‘lgan olim edi. O‘z ish faoliyati davomida yosh ilmiy kadrlar tayyorlashga katta e’tibor qaratgan. Uning rahbarligida 2 olim nomzodlik dissertatsiyalarini himoya qilgan. Q.Boyqo‘ziyevning sa’y - harakatlari tufayli Farg‘ona matematiklari maktabi dotsentlar - A.Abdurazzoqov, J.Mamajonov, M.M.Mamajonov,M.Mamajonov,K.Rajabov, Sh.Soliyev, I.Nabiyev, N.Sobirov kabi o‘nlab shogirdlari hisobiga kengaydi.
