Olimaning suyanch tog‘lari
Baland dovon sari ko‘tarilmoq aslida mashaqqat.
Agar dovondan oshgan kishi ortga qaytsa erishilgan yutuqlarni boy berib qo‘yishi mumkin.
Demak faqat ilgarilash kerak!
Umidli odam borki ilgariga yursin, dovonlarni zabt etsin, olsinu oldirmasin!
Guli Isayeva yoshlik chog‘laridek ana shunday katta niyatni diliga jo etdi. Ezgu niyati uni ulkan maqsadlar yo‘li tomon boshladi....
Guli Parpiyevna 1966 yil 21 sentyabrda Qozog‘iston Respublikasining Chimkent viloyatida tavallud topgan. O‘rta maktabni tamomlagach, Toshkentdagi Y.Rajabiy nomli pedagogika bilim yurtiga o‘qishga kirdi va 1987 yili imtiyozli tamomladi. Unda pedagogga xos vazminlik , sokinlik, kamtarlik mujassam. Guli o‘z bilimini yanada oshirish niyatida Nizomiy nomidagi Toshkent davlat pedagogika institutiga kirib o‘qidi. 1990 yili hozirgi GulDU (G‘.G‘ulom nomli Sirdaryo pedagogika instituti) ga yo‘llanma asosida ishga kirdi.
1997-2000 yilda aspiranturada tahsil olib, yana sevimli jamoasi –universitetga qaytdi.2007 yilda pedagogika fanlari nomzodi bo‘ldi.Yosh olima o‘zidagi qiziqish va iqtidorni hamon susaytirganicha yo‘q. Ayni paytda u ilm sohasida izlanishlarni davom ettirayotir. GulDU pedagogika fakulteti o‘quv ishlari bo‘yicha dekan muovini sifatida bir zum tinchimaydi.
Bugungi yoshlar bilan muloqatda bo‘lib, ular bilan tengma-teng qadam tashlash oson emas,-deydi olima.
Guli Isayeva oddiy ishchi oilasida kamol topgan. Otasi Parpi Isayev hozir nafaqada . Onasi Anzirat aya nihoyatda bolajon ayol . Oiladagi o‘zaro mehr, samimiy munosabat bois voyaga yetgan to‘qqiz nafar o‘g‘il-qizning hammasi oliy ma’lumotli.
Onajonimning jahli chiqqanini sira ko‘rmaganman, doimo tabassum bilan gapiradilar. Otam ham nihoyatda vazmin va samimiy inson. Suyanch tog‘larimdagi shu fazilatlar yoqadi menga. O‘zlari o‘qimishli bo‘lmasada bizlarga keng imkoniyat yaratishdi....
Guli sportni, musiqani sevadi. Turmush o‘rtog‘i To‘lqin Egamberdiev - energetik. Ularning farzandlari Xadicha va Elnur ham a’lochi zukko o‘quvchilar hisoblanishadi.
Inson o‘zidagi barcha yaxshi sifatlarni avvalo ota - onadan , keyin kitobdan olishini o‘z hayot tajribamda sinadim.
Menda kitobga cheksiz mehrni, bilimga ishtiyoqni , hayotga muhabbatni o‘rgatishgani uchun suyanch tog‘larim-otam va onamdan benihoya minnatdorman, - deydi olima Guli Isaeva.
