Filologiya fanlari doktori, professor
1963 yil 12 yanvarda Marg‘ilon shahrida tug‘ilgan. 1970 - 1980 yillarda Farg‘ona davlat pedagogika instituti o‘zbek filologiyasi fakultetida tahsil olgan. 1990 yildan beri Farg‘ona davlat universiteti o‘zbek tilshunosligi kafedrasida o‘qituvchi, katta o‘qituvchi, dotsent, professor, kafedra professori lavozimida ishlamoqda.
1994 yilda “O‘zbek nutq odatining muloqot shakllari” mavzusida nomzodl disrtatsiyasini , 1994 yilda professor A.Nurmonov ilmiy maslahatchiligida “O‘zbek tili leksikasini mazmuniy maydon sifatida o‘rganish ( shaxs mikromaydoni)” mavzusida doktorlik dissertatsiyasini himoya qilgan, 2007 yilda professorlik unvonini olgan.
Sh.Iskandarova o‘zbek tilshunosligida, tilga sistem-struktur asosda yondashuv bilan bog‘liq yangi yo‘nalishning rivojiga, davlat tilining ijtimoiy - ma’naviy hayotdagi mavqeini oshirishga, ma’naviy merosimizni targ‘ib qilishga o‘z hissasini qo‘shib kelayotgan tilshunos olimadir. U tilning sistemaviy tabiati, tilshunoslikda maydon nazariyasi bo‘yicha qator tadqiqotlar muallifi sifatida respublika ilmiy jamoatchiligi o‘rtasida munosib mavqega ega.
Shu kungacha uning rahbarligida 4 ta nomzodlik dissertatsiyasi himoya qilindi, hozirda 10 ga yaqin tadqiqotchilar ilmiy izlanish olib bormoqdalar.
Sh.Iskandarovaning shu kunga qadar 10 ga yaqin o‘quv - uslubiy qo‘llanmasi, 3 monografiyasi, respublikaning nufuzli ilmiy jurnallari va to‘plamlarida 100 dan ortiq ilmiy maqolalari e’lon qilingan. Jumladan, olima “Leksikani mazmuniy maydon asosida o‘rganish”, “Til sistemasiga maydon asosida yondashuv” nomli monografiya, universitet filologiya yo‘nalishi bakalavr va magistr talabalari uchun “Uzbek tilining nazariy grammatikasi. Morfologiya”, “Sistem tilshunoslik asoslari”, “Umumiy tilshunoslik”, “Tilshunoslik nazariyasi”, “Tilshunoslikning nazariy masalalari” singari qator o‘quv qo‘llanmalarini yaratdi.
2003 - 2005 yillarda Far DU huzuridagi tilshunoslik yo‘nalishi bo‘yicha ixtisoslashgan Kengash raisi o‘rinbosari, 2008 - 2012 yillarda UzR FA Alisher Navoiy nomidagi Til va adabiyot instituta qoshidagi tilshunoslik yo‘nalishi bo‘yicha doktorlik ilmiy darajasini olish uchun dissertatsiyalar himoyasi ixtisoslashtirilgan ilmiy Kengashining a’zosi bo‘lgan. 2012 yildan UzMU, O‘zR FA Til va adabiyot instituti hamda FarDU qoshidagi tilshunoslik va adabiyotshunoslik yo‘nalishi bo‘yicha doktorlik ilmiy darajasini olish uchun dissertatsiyalar himoyasi bo‘yicha birlashgan ixtisoslashgan Kengash a’zosi.
2006 yilda “Shuhrat” medali, 2012 yilda “Mehnat shuhrati” ordeni bilan mukofotlangan.
