Biologiya fanlari doktori, professor
Isroiljon Karimov 1952 yil 22 aprelda Rishtonda xizmatchi oilasida tug‘ilgan. U 1959 yilda Rilton qishlog‘idagi 26 - maktabning 1- sinfiga o‘qishga boradi va sakkizinchi sinfni bitirgach, Yozyovon tumanidagi qishloq xo‘jalik texnikumining agronomiya bo‘limiga o‘qishga kirdi. Bu texnikumni 1971 yilda bitirib chiqgach, harbiy xizmatga chaqiriladi. 1972 yilda harbiy xizmatni tugatgach, oz muddat “Rishton” davlat xo‘jaligida xizmatkor - agronom bo‘lib ishladi. 1973 yilda Farg‘ona davlat pedagogika instituti(hozirgiFarDU) tibbiyot - geografiya fakultetining biologiya va qishloq xo‘jaligi asoslari bo‘limiga o‘qishga kirdi. Yoshligida bo‘lgani kabi ilm olishga qiziqib, institutda fan asoslarini puxta o‘rganishga, ilmiy tadqiqot ishlari olib borishga, jamoat ishlarida faol bo‘lishga astoydil harakat qildi.
FDPIni bitirgach, uni institut yoshlar tashkilotida ishga olib qolishdi. Undagi ilm - fanga bo‘lgan salohiyatni payqagan O‘z FA akademigi Avliyoxon Muhammadiyev, ustozlari Alisher Muhammadiyev, E’tiborxon Rahmonova kabilar uning ilmiy sohada shug‘ullanishini maslahat berdilar.
1979 yili ustozlari yo‘llanmasi bilan Tojikiston Chorvachilik ilmiy tadqiqot institutiga ishga o‘tdi. Tez orada mazkur institut professori Ahmad Valiyev rahbarligida ilmiy izlanishlar olib bordi. Nomzodlik ishi bo‘yicha mavzu tasdiqlangach, u Moskvadagi P. Lumumba nomli Xalqlar do‘stligi universiteti professori I. S. Belyuchenko rahbarligida ilmiy tajribalar olib bordi va 1984 yili “Janubiy Amerikada o‘sadigan shirali ozuqa ekinlarini Markaziy Osiyo sharoitida o‘stirishning mahalliylashtirilgan asoslari va uning chorvachilikka ta’siri” mavzusida nomzodlik dissertatsiyasini yoqladi.
Yosh olim ilmiy sohadagi ishlarini davom ettirib, qunt bilan tadqiqot va tajribalar o‘tkazishi natijasida 1992 yilda doktorlik dissertatsiyasini muvafaqqiyatli yoqladi. 1995 yilda unga professor ilmiy unvoni berildi.
2007 yilda Moskva yaqinidagi qishloqda uning rahbarligida “Agro ekologiya” fermer xo‘jaligi tashkil etildi.
Isroiljon Abdulhayevichning 100 dan ziyod ilmiy monografiya, risola va maqolalari chop etilgan. Ko‘pgina mamlakatlardagi nufuzli oliy o‘quv yurtlari uni turli mavzularda ma’ruzalar o‘qishga taklif qilganlar. Germaniya, Gollandiya, Misr Arab Respublikasi, Mongoliya, Zimbabve davlatlari olimlari uning nomini hurmat bilan tilga oladilar.
Professor I.Karimov qisqa, ammo mazmunli umr kechirdi. U o‘zi bilan FDPIda o‘qigan umr yo‘ldoshi Halimaxon aya bilan 4 farzandni tarbiyalab voyaga yetkazdilar. Isroiljon Abdulhayevichning yorqin xotirasi qalbimizda doimo saqlanib qoladi.
