Filologiya fanlari doktori, professor
1946 yil 22 sentyabrda Farg‘ona viloyatining Qo‘shtepa tumanidagi eshonguzar qishlog‘ida tug‘ilgan. 1964 yilda o‘rta maktabni muvaffaqiyatli bitirib, Farg‘ona davlat pedagogika instituti filologiya fakultetiga o‘qishga kirdi. 1968 yilda fakultetni imtiyozli tugatgach, institut rektorati taklifi bilan o‘zbek tilshunosligi kafedrasi o‘qituvchisi lavozimiga ishga olib qolindi. 1971 yilda o‘zbek tilshunosligi kafedrasi qoshidagi maqsadli aspiranturaga o‘qishga kirib, 1974 yilda uni muvaffaqiyatli yakunladi. Shundan buyon u Farg‘ona davlat pedagogika instituti (keyinchalik FarDU)da faoliyat ko‘rsatib kelmoqda . Olim bu davr mobaynida o‘qituvchi, kafedra mudiri, dekan o‘rinbosari, fakultet dekani lavozimlarida ishladi. 1975 yilda O‘zR FA akademigi G‘.Abdurahmonov rahbarligida “Hozirgi zamon o‘zbek adabiy tilida periodlar” mavzuidagi nomzodlik, 1991 yilda “Uzbek tili qo‘shma gaplarining stilistik xususiyatlari” mavzuidagi doktorlik dissertatsiyalarini himoya qildi.
O‘zbek tilshunosligi rivojiga o‘zining munosib hissasini qo‘shgan, 5 monografiya hamda 10 dan ortiq o‘quv va uslubiy qo‘llanmalar, 200 dan ortiq ilmiy maqolalar muallifi, professor A.Mamajonovning o‘zbek tilshunosligiga yangi yo‘nalish - matn lingvistikasining kirib kelishidagi xizmatlari e’tiborga loyiqdir. Olim bu borada qator ilmiy risolalar va qo‘llanmalar yaratdi. A.Mamajonov uslubshunoslik va matnlingvistikasi bo‘yicha alohida maktab yaratgan ustozdir. Uning bevosita ilmiy rahbarligida 6 nafar tadqiqotchi nomzodlik, 1 nafari doktorlik dissertatsiyalarini himoya qildi.
1992 - 1995 yillarda O‘zRFA Oliy attestatsiya Komissiyasi huzuridagi gumanitar fanlar bo‘yicha ekspert komissiyasi a’zosi, 1996 - 2001 yillarda O‘zRFA Alisher Navoiy nomidagi Til va adabiyot instituti qoshidagi muvofiqlashtiruvchi Kengash a’zosi, 2000 - 2005 yillarda Farg‘ona davlat universiteti ilmiy Kengashi qoshidagi o‘quv – uslubiy komissiyasi raisi sifatida faoliyat ko‘rsatdi. 2003 - 2005 yillarda FarDU huzurida tashkil etilgan fan nomzodi ilmiy darajasini olish uchun tashkil etilgan ixtisoslashgani lmiy Kengash raisi vazifasini bajardi.
A.Mamajonovga 1998 yilda “FarDUda xizmat ko‘rsatgan professor”, 2000 yilda ta’lim sohasidagi keng qamrovli faoliyati uchun O‘zbekistan Respublikasi Oliy ta’lim vazirligi hamda Respublika “Ustoz” jamg‘armasi tomonidan “Ustoz” faxriy unvonlari berilgan. 2012 yild aesa olim Turon Faning akademigi ilmiy unvoniga sazovor bo‘ldi. 2004 yilda FarDUda o‘tkazilgan “Yilning eng yaxshi o‘qituvchisi” tanlovi g‘olibi.
Hozirgi kunda FarDU tilshunoslik kafedrasi professori lavozimida faoliyat ko‘rsatmoqda.
