Filologiya fanlari nomzodi, dotsent
1976 yil 9 iyulda O‘zbekiston tumani, Bekobod qishlog‘ida tug‘ilgan 1993 yilda 19 - o‘rta maktabni imtiyozli shahodatnoma bilan tugatib, FDU o‘zbek filologiyasi fakultetiga test usulidagi sinovning eng yuqori ko‘rsatkichi bilan o‘qishga qabul qilindi. Talabalik yillarida uning qator ilmiy - ommabop maqolalari, o‘nlab she’rlari viloyat hamda respublika matbuotida chop etildi. 1998 yil O‘zbekiston Mustaqilligining 7 yilligiga bag‘ishlangan “Oltin belanchak“ to‘plamidan uning turkum she’rlari o‘rin olgan.
G.Muhammadjonova 1998 yilda universitetni imtiyozli diplom bilan tugallab, Andijon DU aspiranturasiga o‘qishga qabul qilindi. 2004 yil oktyabrda professor A.Nurmonov rahbarligida “80 - yillar oxiri - 90 – yiilar boshlari o‘zbek she’riyatining lingvopoetik tadqiqi” mavzuidagi nomzodlik dissertatsiyasini O‘zR FA Alisher Navoiy nomidagi Til va adabiyot instituti ixtisoslashgan Kengashida muvaffaqiyatli himoya qildi.
Uning “Badiiy asar tahlilida ijodkorning uslubiy mahorati masalasi”, “Tarixiy so‘zlarning hozirgi o‘zbek she’riyatidagi o‘rni”, “Hozirgi o‘zbek she’riyatida iboralar”, “80 - 90 yillar she’riyatida jonlantirishdan foydalanish mahorati” kabi qator ilmiy maqolalari lingvopoetik masalalarni keng yoritib berishga qaratilgan.
2003 yildan “Umumiy tilshunoslik va xorij adabiyoti” kafedrasida universitetdagi pedagogik faoliyatini boshlagan G.Muhammadjonova 2005 - 2011 yillar mobaynida mazkur kafedra mudiri lavozimida ishladi. 2012 - 2015 yillarda adabiyotshunoslik kafedrasi katta o‘qituvchisi, dotsenti lavozimlarida, 2015 yildan ayni kafedraning mudiri lavozimida ishlab kelmoqda. Shuningdek, universitet Ustoz va murabbiylar kengashi raisi sifatida universitet ma’naviy - ma’rifiy ishlarida va yoshlar o‘rtasida ma’naviy barkamollikni yuksaltirish borasidagi tadbirlarning faol ishtirokchisi.
40 dan ortiq maqola va oliy o‘quv yurti talabalari uchun “Qiyosiy adabiyotshunoslik” (2011), “Badiiy asar tahlili” (2015) nomli o‘quv - uslubiy qo‘llanmalar muallifi. Shuningdek, Respublika “Kamolot” YoIH faxriy yorlig’i bilan taqdirlangan.
