Dasturiy injiniring bo‘yicha falsafa doktori
1983 yil 24 dekabrda Rishton tumani To‘da qishlog‘ida tug‘ilgan. 7 - o‘rta maktabning 9 - sinfini namunali tamomlab, 1998 yildan 2001 yilgacha Farg‘ona davlat universiteti qoshidagi akademik litseyda tahsil olgan. 2001 yil Toshkent Islom universitetining informatika va axborot texnologiyalari yo‘nalishiga davlat granti asosida o‘qishga qabul qilingan. 2005 yil universitetni muvaffaqiyatli bitirib, bakalavr darajasini qo‘lga kiritgan. Shu yilning o‘zida Toshkent axborot texnologiyalari universiteti Elektron tijorat kafedrasi magistraturasiga qabul qilinib, 2017 yil magistrlik darajasiga ega bo‘lgan.
A. Nemadaliyev turli tashkilot va muassasalarda, jumladan, “Datasite” MChJ, Koreya elchixonasi va TATU qoshidagi ilmiy izlanish markazida, Respublika Oliy Sudi muassisligidagi gazeta tahririyatida, O‘zbekiston Matbuot va axborot agentligida turli vazifalarda faoliyat yuritgan. 2008 yili Malayziyaning Kuala - Lumpur shahridagi Putra universitetining ilmiy izlanishlar va iqtisodiy, ijtimoiy tahlillar markazi assistenti bo‘lib ish boshlagan. Shu universitetning kompyuter fanlari va informatsion texnologiyalar fakultetining “Dasturiy injiniring” (Software Engineering) kafedrasi aspiranturasida tahsil oldi. 2016 yil avgust oyida dasturiy injiniring sohasi bo‘yicha – “Yopiq inshootlar ichida ob’ektlarning joylashish tizimini samarali ta’minlash uchun Chebmshev veyvletlari asosidagi ehtimolliklar funktsiyalari yordamidaWi - Fi signallari radio xaritasini tiklash uslubi” (Accurate Wi - Fi Signal Strength recovery method using Chebyshev Wavelet based approximation for Indoor Positioning) deb nomlangan tadqiqot mavzusi bo‘yicha doktorlik (Doctor of Philosophy in Software Engineering) dissertatsiyasini muvaffaqiyatli himoya qilib, fan doktori unvoniga sazovor bo‘ldi.
Bugungi kunda Malayziyaning birinchi raqamli universiteti - Malaya universitetining kompyuter fanlari va informatsion texnologiyalari fakulteti sun’iy intellekt kafedrasiga ilmiy tadqiqotchi sifatida taklif etilgan.
2010 yildan 2017 yilgacha nazariy va amaliy bilimlarini bir nechta xorij kompaniyalarida ishlab, mustahkamlab bordi. Jumladan, Kuala - Lumpurdagi Esmology Sdn Bhd krmpaniyasida ofshor biznesi mutaxassisi, Unijaya Recources Sdn Bhd kompaniyasida malakali dasturchi va dasturiy ta’minot arxitektori - menejeri vazifalarini bajarib keldi. 2012 - 2015 yillar oralig‘ida mahalliy hamkorlar bilan birga turli dasturiy ta’minotlarni yaratish va tizimli tahlil - konsalting xizmatlarini taklif qiluvchi Creanonavtive Sdn Bhd va Creanolab Sdn Bhd firmalariga asos soldi. 2015 yildan buyon Ukuya Sdn Bhd va Ukuya LTD kompaniyalari tarmog‘ida texnologiyalar bo‘yicha bosh mutaxassis sifatida ishlab kelmoqda. Shu bilan birga, bu kompaniyaning dasturiy ta’minot tizimlarini ishlab chiqaruvchi ishchi muhandislarining aksariyatini O‘zbekiston ishchi bozoridan topib, Toshkentda shu kompaniyaning filialini tashkil etishga erishdi.
