Abdaz Yo‘ldoshevich Omirov 1937 yil 10 oktyabrda Qirg‘iziston Respublikasining Talas viloyati Budyonovka tumanida tavallud topgan.
1944 - yil Qozog‘iston Respublikasi Jambul viloyatining Taraz shahridagi 16 - maktabga o‘qishga kirib, 1954 yil maktabni kumush medal bilan tamomlagan.
1954 - 1959 yillarda Toshkent Politexnika institutida tahsil olgan va mashinasozlik texnologiyasi, metall qirqish va asbob - uskunalar mutaxassisligini egallagan.
Mehnat faoliyatini 1959 - yilda Toshkent “Foton” korxonasida konstruktorlik lavozimidan boshlagan.
1961 - yilda Taraz shahriga qaytib, sut kombinatida mexanika tsexi boshlig‘i bo‘lib ishlagan.
1965 yili Sverdlovskdagi Ural politexnika instituti aspiranturasiga kirib, 1969 yilda muvaffaqiyatli tamomlagan va shu institutda mashina va metallar kafedrasida assistent bo‘lib ishlagan.
Shu davrda texnologik jihatdan murakkab, tan narxi yuqori va ko‘p mehnat talab qiladigan, andozasi bo‘lmagan stanlarda sovuq prokatlash yo‘li bilan choksiz trubalarni ishlab chiqarish asosiy muammolardan biri edi. A. Y. Omirovning nomzodlik dissertatsiyasi mavzusi shu masalaga bag‘ishlangan bo‘lib, olim uni muvaffaqiyatli himoya qilgan.
1969 yildan 1971 yilgacha Ural politexnika institutida assistent bo‘lib ishlagan.
1971 yil mehnat faoliyatini Taraz shahridagi Qozoq texnologiya institutida davom ettirgan va dotsent, kafedra mudiri lavozimlarida ishlagan.
1980 yilda Namangan shahridagi “Elektroterm” ilmiy ishlab chiqarish birlashmasiga bosh texnolog lavozimiga ishga keldi. Bu yerda u mazkur korxonani avtomatlashtirish va yangi texnologiyalarni joriy etish ishlariga munosib hissa qo‘shdi.
1985 — 1999 yillarda Toshkent politexnika institutining Namangan filialida (hozirgi NamMPI) mashinasozlik texnologiyasi kafedrasida kafedra mudiri, 1990 — 1991 yillari mexanika fakulteti dekani bo‘lib ishlagan.
A. Y. Omirov 70 dan ortiq ilmiy maqola va o‘quv - uslubiy ko‘rsatmalar, 4 ta Rossiya patenti muallifidir. U mashinasozlik texnologiyasi fanidan ikkita o‘quv qo‘llanmasi yaratgan.
2002 yil unga institutning faxriy dotsenti unvoni berilgan.
Olim mashinasozlik texnologiyasi kafedrasi ilmiy salohiyatini oshirish, uning moddiy texnika bazasini mustahkamlash va yuqori malakali mutaxassislar tayyorlash ishiga salmoqli ulush qo‘shib kelmoqda.
