Fizika - matematika fanlari doktori, professor
1958 yil 7 mayda Farg‘ona viloyatining Beshariq tumanida tug‘ilgan. 1979 yilda Farg‘ona davlat pedagogika institutining fizika - texnika fakultetini imtiyozli diplom bilan tamomlagan. 1979 yildan kichik ilmiy xodim lavozimida ish boshlagan. 1984 - 1986 yillarda O‘zFA Fizika texnika instituti aspiranti bo‘lib 1987 yilda “Qo‘rg‘oshin xalkogenidlari asosidagi yupqa pardalardagi fizikaviy jarayonlarni o‘rganish” mavzusida nomzodlik dissertatsiyasini himoya qilgan. 1987 yildan xo‘jalik shartnomasi asosidagi ilmiy tadqiqot ishlarida katta o‘qituvchi, dotsent lavozimlarida ishlab,1994 yilda kafedra mudiri lavozimiga o‘tgan.
Ilmiy tadqiqot ishlarini davom ettirib 2000 yilda “Qo‘rg‘oshin tuzlari asosidagi yupqa pardali infraqizil qabul qilgichlardagi fizikaviy jarayonlarga tashqi tasirlar tadqiqi” mavzusida doktorlik disertatsiyasini O‘zbekiston Fanlar akademiyasi Fizika - texnika instituti ixtisoslashtirilgan ilmiy Kengashida himoya qilgan. 2004 yilda fizika kafedrasi professori ilmiy unvonini olgan.
Dissertatsiya ishi mavzusi bo‘yicha olingan natijalarning amaliy tatbiqi uchun 1988 yilda O‘zFA mukofoti sovrindori bo‘lgan. K. Onarqulov ilmiy rahbarligida 1996 yilda M. Rahmonqulov nomzodlik dissertatsiyasini himoya qilgan. Hozirda u katta ilmiy xodim - izlanuvchilar G‘. Raxmatov va T. Azimovlarning ilmiy rahbari.
K. Onarqulov pedagogik faoliyatini ilmiy tadqiqot ishlari bilan birga muvaffaqiyatli ravishda olib borgan. 1994 - 1996, 1999 - 2002, 2011 yildan hozirgacha fizika kafedrasi mudiri, 2002 - 2004 yillarda o‘quv bo‘limi boshlig‘i, 2004 - 2007 yillarda o‘quv ishlari bo‘yicha prorektor lavozimlarida ishlaganda o‘quv jarayonini takomillashtirish va samaradorligini oshirish bo‘yicha ijobiy natijalarga erishgan. U “Molekulyar fizika”, “Energiya turlarini o‘zgartirish va ular asosidagi qurilmalar”, “Yarim o‘tkazgichlar fizikasi” kabi fanlardan talabalarga saboq beradi.
K. E. Onarqulov tomonidan 2 ta ixtiro uchun patent olingan. Ilmiy jurnallar va to‘plamlarda 100 dan ortiq ilmiy va ilmiy - uslubiy maqolalari e’lon qilingan. Ham mualliflikda 1 ta o‘quv qo‘llanmasini chop etgan. Hozirda fizika - matematika fakulteti fizika kafedrasida ish faoliyatini olib bormoqda.
