Biologiya fanlari nomzodi, dotsent
1955 yil 4 fevralda Farg‘ona viloyatining Oltiariq tumanida tug‘ilgan. 1972 yili Zilxa qishlog‘idagi 17 - o‘rta maktabni tugallagan. 1973 yili Farg‘ona pedagogika instituti tibbiyot fakultetining kimyo - biologiya bo‘limiga o‘qishga kirib, mazkur bo‘limni 1979 yili tugatgan.
1979 yildan boshlab uzluksiz ravishda ilmiy – pedagogik faoliyat bilan shug‘ullanib kelmoqda. Farg‘ona davlat universitetida laborant, ilmiy xodim, o‘qituvchi, fakultet dekani o‘rinbosari, dekan, 1998 yildan kimyo kafedrasi dotsenti lavozimida ishlab kelmoqda.
1997 yilda ilmiy rahbari, dotsent S. Teshaboyev rahbarligida “Farg‘ona viloyati janubiy rayonlari ekosistemasidagi simob miqdorini o‘rganish” mavzusida nomzodlik dissertatsiyasini yoqlagan - biologiya fanlari nomzodi. 2003 yilda kimyo kafedrasi dotsenti ilmiy unvonini olishga muyassar bo‘ldi. S. O‘rmonov vodiyda birinchi bo‘lib analitik kimyoning fizik - kimyoviy analiz usullarini ekologik muammolari yechimiga qaratib, simobni biologik manbalarda aniqlashning yangi uslublarini ishlab chiqdi, uni takomillashtirdi, amaliyotda sinab ko‘rdi va tavsiyalar yaratdi.
S. O‘rmonovning ilmiy izlanish natijalari nafaqat vodiymiz, balki butun Markaziy Osiyo uchun ham o‘ta dolzarb bo‘lgan og‘ir metallarning atrof - muhitga toksikologik ta’siri muammosiga bag‘ishlangan. Uning maqolalari Germaniya, Angliya, Shvetsiya, Rossiyaning nufuzli ilmiy jurnallarida e’lon qilingan. Shuningdek, simobdan tashqari yana 15 ga yaqin kimyoviy elementlar asosida ilmiy tajribalar o‘tkazib, g‘oyat muhim ilmiy natijalarni olshga muyassar bo‘ldi. Tinimsiz izlanishlari natijasida 60 dan ortiq ilmiy maqolalar, 10 ga yaqin ilmiy va uslubiy risolalar chop ettirdi.
