Murodilla Qanoatov 1950 yili Namangan viloyati Yangiqo‘rg‘on tumani Iskovot qishlog‘ida ishchi oilasida tug‘ilgan.
1957 yili Yangiqo‘rg‘on tumanidagi Zarkent qishlog‘ida joylashgan 30 - o‘rta maktabga o‘qishga kirib, 1967 yili mazkur maktabni oltin medal bilan tugatdi. Shu yili Toshkent xalq xo‘jaligi institutining iqtisodiy kibernetika fakultetiga o‘qishga kirib, 1972 yili iqtisodchi - matematik mutaxassisligi bo‘yicha imtiyozli diplom bilan tugatgan.
Mehnat faoliyatini 1972 yili Butunittifoq qishloq xo‘jaligi fanlari akademiyasining O‘rta Osiyo qishloq xo‘jaligi iqtisodiyoti ilmiy tadqiqot instituti Namangan filialida katta mutaxassislikdan boshlagan.
1976 - 1979 yillarda mazkur institut aspiranturasida tahsil oldi va 1979 yili taniqli olim, iqtisod fanlari doktori, professor F. Q. Qayumovning ilmiy rahbarligi ostida “Kapital sarflar va asosiy ishlab chiqarish fondlarining iqtisodiy samaradorligini oshirish” (Namangan viloyati qishloq xo‘jaligi korxonalari misolida) mavzusida nomzodlik dissertatsiyasini himoya qildi. Ilmiy kengash a’zolari: akademik K. I. Lapkin, akademik X. M. Jalilov, professorlar A. S. Samutali, V. V. Kim, S. N. Usmonov va boshqalar ilmiy ishga yuqori baho berdilar.
1979 - 1986 yillarda yuqorida nomi keltirilgan institutning Namangan filialida bo‘lim boshligi bo‘lib ishladi. Namangan viloyati qishloq xo‘jaligini rivojlantirishning ijtimoiy - iqtisodiy yo‘nalishlarini ishlab chiqish va joriy etish, jamoa va davlat xo‘jaliklarida oilaviy pudratni qo‘llash, buxgalteriya ishlarini mexanizatsiyalash bo‘yicha faol ish olib bordi.
1986 yili Yangiqo‘rg‘on tumanidagi “Pobeda” davlat xo‘jaligiga ishga yuborildi va xo‘jaliqda 1986 - 1988 yillar mobaynida bosh iqtisodchi vazifasida ishladi.
M. Qanoatov 1988 yili Toshkent politexnika instituti Namangan filialiga (hozirgi NamMPI) ishga taklif etildi. Olim bu yerda hozirga qadar iqtisodiyot nazariyasi kafedrasi mudiri, dotsenti vazifasida ishlab kelmoqda.
U 60 dan ortiq ilmiy maqolalar, qo‘lllanmalar va o‘quv - uslubiy ishlar muallifidir.
