Baxodir Shamsiddinovich Rizayev 1952 yil 25 mayda Namangan shahrida xizmatchi oilasida tug‘ilgan.
1958 - 1968 yillarda Namangan shahridagi 18 - o‘rta maktabda o‘qib, uni oltin medal bilan tamomlagan.
1968 yilda Toshkent politexnika institutining qurilish fakultetiga o‘qishga kirgan va shu institutni 1973 yilda muvaffaqiyatli tugatgan. O‘z mehnat faoliyatini Namangan viloyati yo‘l qurilish boshqarmasida boshlagan. 1973 yildan 1981 yilgacha shu boshqarmada katta muhandis, markaziy daboratoriya boshlig‘i, ishlab chiqarish va texnika bo‘limi boshlig‘i lavozimlarida ishladi. 1981 yili Toshkent politexnika instituti Namangan filiali (hozirgi NamMPI) rahbariyati B. Sh. Rizayevni ishga taklif etdi. Institutda ishlash bilan bir vaqtda Toshkent politexnika instituti aspiranturasining sirtqi bo‘limida tahsil oldi.
1994 yilda “Qurilish konstruktsiyalari, bino va inshootlar” mutaxassisligi bo‘yicha “Quruq - issiq iqlim sharoitidagi nomarkaziy qisilgan temir - beton ustunlar mustahkamligi, deformatsiyasi va yoriqbardoshligi” mavzusida nomzodlik dissertatsiyasini muvaffaqiyatli himoya qilgan va texnika fanlari nomzodi ilmiy darajasiga sazovor bo‘lgan.
Uning rahbarligi ostida institut talabalari fanlar olimpiadalarining respublika bosqichida qurilish materiallari fanidan bir necha marta faxrli birinchi va ikkinchi o‘rinlarni egalladilar.
Qurilish ishlab chiqarish korxonalari bilan uzviy hamkorlikda faoliyat olib boradi. Kafedra olimlari bilan birgalikda Kosonsoy qurilish materiallari kombinati ohak tsexini qayta ta’mirlash bo‘yicha muhim ilmiy ishlab chiqarish loyihasida ishtirok etdi.
B. Sh. Rizayev olimlik faoliyati davomida 45 dan ortiq ilmiy va uslubiy ishlar chop ettirgan.
Hozirda “Quruq - issiq iqlim sharoitida foydalanilayotgan temir - beton qurilmalari holati va ularga ta’sir etuvchi omillarni o‘rganish” mavzusi ustida ishlamoqda.
