Ro‘ziyeva Dilobar Isomjonovna

Dilobar Isomjonovna 1969 yilda Buxoro viloyatining Qorako‘l shahrida tug‘ilgan. Buxoro yuqori-texnologiyalar muxandislik texnika instituti sanoatda ishlab chiqarishni tashkil etish kafedrasi mudiri, iqtisod fanlari nomzodi, dotsent.
  Dilobar har jabhada Dilnoza opasiga o‘xshashga harakat qilardi. Otasi Isomjon aka «Shu Dilnoz qizim juda chaqqonda, birpasda uy ishlarini ham bajaradi, darslarini ham beshga tayyorlaydi», deb erkalashni boshlasa, darhol otasi yoniga borib, men ham a’lochiman, men ham bugun to‘rtta besh baho oldim, men ham bugun uylarni supurdim deb maqtanishga tushardi.
  - Bo‘lmasamchi, yaxshi qizning singlisi ham yaxshi bo‘ladida. Sendan ham xursandman. Sizlar mening faxrimsizlar, - derdi qizining boshini silab. - Ilohim yaratgan niyatingga yetkazsin. Farzandlaring o‘zingga o‘xshab odobli, batartib, bilimdon bo‘lishsin. Hammamizning yuzimizni yorug‘ qilishsin, - deb, duoga qo‘l ochadi. Duolar ijobat bo‘ldi.