Biologiya fanlari nomzodi, dotsent
1939 yil 25 iyunda Toshkent shahrida tug‘ilgan. 1963 yilda Farg‘ona davlat pedagogika instituti tibbiyot fakulteti biologiya-geografiya bo‘limini tugatgandan so‘ng , mazkur institutining botanika kafedrasida assistent lavozimida o‘z faoliyatini boshlagan.
Ilmga bo‘lgan qiziqish uni 1969 yili Toshkent shahriga – O‘zbekiston Fanlar akademiyasining O‘simlik kimyosi institutiga yetaklagan. Bu yerda taniqli botanik - xomashyoshunos olim Ye. Ye. Karakova rahbarligida eng qimmatli dorivor o‘simliklardan hisoblangan bo‘rigulning bioekologiyasi, tarqlishi, tabiiy zahiralarini aniqlashga qaratilgan ilmiy – tadqiqot ishlarini olib borgan.
Mazkur institutda 1969 - 1972 yillari u aspirant, so‘ng 1979 yilgacha ilmiy xodim sifatida faoliyat ko‘rsatgan. Ko‘p yillik izlanishlari natijasida 1979 yilning aprelida “Bo‘rigul o‘simligining Farg‘ona vodiysi o‘simlik qoplamida o‘rni” mavzusida nomzodlik dissertatsiyasini himoya qilib, biologiya fanlari nomzodi ilmiy darajasini olgan.
R. Sahobiddinov 1980 - 1988 yillar davomida Toshkent qishloq xo‘jaligi institutining Farg‘ona filialida ilmiy bo‘lim mudiri, kafedra o‘qituvchisi lavozimlarida ishlagan. FDPI ning botanika kafedrasida 1988 yildan boshlab o‘z faoliyatini davom ettirgan. Uning 60 ga yaqin ilmiy ishlari chop etilgan. R.Sahobiddinov xomashyoshunos – botanik mutaxassis sifatida qator xorijiy olimlar ishtirokida tuzilgan “Arealiy lekarsvenniyx rasteniy” (1976) monografiyasini yozishda ishtirok etgan.
