Odamlarni suyib, odamlarni deb...
Shayxova Guli Islomovna , 1951 yilda Toshkent shahrida tug‘ilgan. Toshkent tibbiyot akademiyasi “Bolalar , o‘smirlar gigiyenasi va ovqatlanish gigiyenasi” kafedrasi mudiri, tibbiyot fanlari doktori, professor. Xalqaro ilmiy Akademiya akademigi, O‘zbekiston Respublikasi Sog‘liqni saqlash vazirligining bolalar va o‘smirlar gigiyenasi bosh mutaxassisi.
Guli Islomovnani O‘zbekistonda nafaqat tibbiyotchilar balki butun xalq taniydi. Uning “O‘zbekiston” va “Yoshlar” telekanallaridagi tibbiy ko‘rsatuvchilarni yetti yoshdan yetmish yoshgacha bo‘lgan keksa-yu yosh qiziqib tomosha qiladi. Shifokor sifatida maslahatlari, yo‘l-yo‘riqlari asosida sog‘liqlarini tiklashga intilishadi. Chunki har bir kasallik, uning oldini olish haqidagi aniq maslahatlari tufayli qanchadan-qancha bemor tomoshabinlar o‘z dardlariga shifo topishyapti. Xalqimizning tibbiy malakasini oshirishda ham olimaning xizmatlari beqiyos.
Guli maktabda o‘qib yurgan chog‘laridek, kelajakda shifokor bo‘laman ,degan niyatni diliga qo‘ygan edi. Yaxshi niyat yarim davlat. Ezgu niyati ro‘yobga chiqib, u 1969 yilda Toshkent davlat tibbiyot institutining sanitariya-gigiyena fakulteti talabasiga aylandi va 1975 yil o‘qishni muvaffaqiyatli tugatdi.
1977 yildan Toshkent davlat tibbiyot instituti qoshidagi “Ovqatlanish kafedrasi”da aspirant so‘ng assistent, dotsent lavozimlarida ishladi.
Ma’lumki inson salomatligining birinchi garovi- gigiyenaga amal qilish va albatta to‘g‘ri ovqatlanish . Bir qarashda juda jo‘n ko‘ringan ovqatlanish aslida san’at- taomlanish, sog‘liqni asrash saati . Buning uchun odam o‘z imkoniyatini bilishi, ota-bobolarimizdan qolgan rejimni yodda tutishi kerak. Afsuski, yashash tarzimiz , turmush sharoitimiz yaxshilanib, dasturxonimiz turli noz-ne’matlarga boyib borgani sari kishilarning sog‘lig‘i yomonlashib boryapti. Turli oshqozon , ichak, jigar xastaliklariga chalinib qolyapmiz. Bunga sabab esa, o‘sha noto‘g‘ri ovqatlanish . Juda ko‘p bemorlar bilan suhbatlashgan , kuzatuvlar olib borgan Guli Islomovna ilmiy ishining mavzusini shunga qaratdi.1984- yilda nomzodlik dissertatsiyasini himoya qildi. Endi tibbiyot fanlari nomzodi, dotsent bo‘lib ham shifokorlik , ham pedagoglik faoliyatini yuritdi. Ilmiy ishini ham davom ettirdi.
U 1990 - 1993 yillarda Moskva shahrida Tibbiyot fanlari akademiyasi qoshidagi “Ovqatlanish instituti” doktoranturasida o‘qidi. Doktorlik dissertatsiyasini yoqlab ,ona yurtiga qaytgan olima 1993 - yildan Ikkinchi Toshkent davlat tibbiyot institutining «Bolalar va o‘smirlar gigiyenasi» kafedrasida dotsent, professor, keyinroq kafedra mudiri lavozimlarida ishladi.
Guli Islomovna tibbiyot akademiyasining eng serg‘ayrat, eng serqirra, eng mehnatkash olimasi. U bir joyda turib qolishni tasavvur qilolmaydi. Doimo harakatda, izlanishda.
U ayollar va yosh bolalar orasida tarqalgan temir tanqisligi, kamqonlikni oldini olish, uni davolash maqsadida respublikamizning Qoraqalpog‘iston, Xorazm, Toshkent viloyatidagi homilador va emizuvchi ayollar, bolalar va o‘smirlarning iqtisodiy sharoiti, kasallanishi va ratsional ovqatlanishini atroflicha o‘rgandi va bu kuzatuvlari asnosida amaliy takliflar berdi. Kasallikni oldini olish uchun temir va zarur vitaminlar bilan boyitilgan non va qandolat mahsulotlarini, pashtet va siroplarini «O‘zdonmahsulot» va «O‘zximfarm» texnologlari bilan birgalikda ishlab chiqdi. Ularni aholiga yetkazishga ham bosh-qosh bo‘ldi. TTK (Temir tanqisligi kamqonligi)ni oldini olish va davolashga yo‘naltirilgan oziq-ovqatlar haqida bayon qilingan 2 ta monografiya ham bemorlarning davolanishida ayni muddao bo‘ldi. Respublikamizda un mahsulotlarini temir moddasi va vitaminlar bilan boyitish, tuz va boshqa oziq-ovqat mahsulotlarini yod bilan boyitish loyihasini amalga oshirishda bevosita ishtirok etdi.
Farzandlari sog‘lom yurt qudratli bo‘ladi. Biz bugun go‘daklarimizni, bolalarimizni sog‘lom qilib voyaga yetkazsak, demakki O‘zbekistonimizning ertasi, kelajagi sog‘lom bo‘ladi. Chunki sog‘lom odamgina sog‘lom fikrlaydi, sog‘lom voyaga yetishda esa to‘g‘ri ovqatlanishning o‘rni beqiyos, deydi olima. Ana shu fikrlari mujassamlashgan monografiyani «Bolalar va o‘smirlar ratsional ovqatlanishi» deb nomlagan.
Guli Islomovna o‘z bilim va tajribalarini shogirdlariga o‘rgatishdan charchamaydi. U Toshkent tibbiyot akademiyasining yuqori kurs talabalariga rus va o‘zbek tillarida 4 ta o‘quv dasturi yozdi. 6 ta monografiya, 30 dan ortiq o‘quv qo‘llanmalar va uslubiy ishlar, 10 dan ortiq sanitariya qonunlari va me’yoriy hujjatlar muallifi.
Kasallikni davolashdan ko‘ra uning oldini olish oson, shioriga amal qilgan olima, Respublika Sog‘liqni saqlash vazirligi qoshidagi bolalar va o‘smirlar gigienasi bosh mutaxassisi sifatida tez-tez Respublikamiz viloyatlaridagi maktab, litsey, kollejlarda bo‘ladi. «Bolalarni gigiyenik tarbiyalash, ularni ratsional ovqatlanishi», «Kamqonlik va epidemik buqoq kasalliklari, gelmintoz va uning oldini olish chora-tadbirlari», «Jismoniy tarbiya, sport, ularning turlari», «Sog‘lom turmush tarzi va uning shakllari» kabi dolzarb mavzularda suhbat va seminarlar o‘tkazadi. Ustoz-murabbiyning bugun o‘nlab shogirdlari bor. Ikkita shogirdi esa fan doktori bo‘ldi. Guli Islomovna O‘zbekiston tibbiyoti rivojiga munosib hissa qo‘shayotgan shogirdlari faoliyatini kuzatib bir quvonsa, uning ishini davom ettirib yelkadosh bo‘lgan katta o‘g‘li, tibbiyot fanlari nomzodi shifokor-jarroh Shahzodjonni, shifokor kelinlarini ko‘rib yana bir quvonadi. Huquqshunoslik kasbini tanlagan kenjatoyi Sherzodjon bilan faxrlanadi. Atrofida buvijonlab, chug‘urlab yurgan nabiralarini bag‘riga bosib, charchoqlarini unutadi. O‘zida yana bitmas kuch-g‘ayrat paydo bo‘lganini his qilib, yangi-yangi rejalar maqsadlar tuzadi. Orzularingiz qanot yozaversin, xalq salomatligi yo‘lida ishlab tolmang, o‘zingiz ham sog‘ bo‘ling, suyukli, shirinsuxan shifokor olimamiz.
