Falsafa fanlari doktori, professor
S.Sodiqov 1937 yil 21 may kuni Rishton qishlog‘ida oddiy ishchi oilasida tug‘ilgan. Otasi Azamjon Sodiqov Ikkinchi Jahon urushi qatnashchisi bo‘lib, tuman MTS da haydovchi, onasi esa tibbiyot hamshirasi edi. Yosh Salimjon ayni urush avj olgan 1944 yilda Rishtondagi 1 - sonli maktabga o‘qishga kiradi. 1953 - 1957 yillarda “Shimoliy So‘x” neft - gaz ishlab chiqarish korxonasida haydovchi bo‘lib ishlaydi. 1957 - 1960 yillarda armiya safida xizmat qiladi. 1962 yilda esa tumandagi ishchi yoshlar kechki maktabini tugatadi.
Salimjon Sodiqov Rishton tumani yoshlari orasidan birinchi bo‘lib 1962 yilda M.V.Lomonosov nomidagi Moskva davlat universitetining falsafa fakultetiga o‘qishga kirib, 1968 yilda mazkur nufuzli universitetni imtiyozli diplom bilan tugatadi. Uning iqtidori va ilmiy izlanishlarga bo‘lgan intilishini sezgan universitet olimlari aspiranturada o‘qishga chorlaydilar.
1973 yilda falsafa fanidagi dolzarb yo‘nalishlardan biriga bag‘ishlangan nomzodlik dissertatsiyasini muvaffaqiyatli yoqladi. 1972 - 1979 yillarda Samarqand davlat arxitektura - qurilish institutida oddiy o‘qituvchi, katta o‘qituvchi, falsafa kafedrasi dotsenti va mudiri lavozimlarida mehnat qildi. 1979 - 1981 yillarda Moskva davlat universitetining falsafa fakultetida doktoranturani o‘tadi.
1982 yilda MDU Ilmiy Kengashida MDU professori V.I.Razin rahbarligida “Jamiyat taraqqiyotida sinfiylik va milliylikning o‘zaro aloqadorligi” mavzusidagi doktorlik dissertatsiyasini muvaffaqiyatli yoqladi. 1983 yilda shu mavzudagi monografiyasi “O‘zbekiston” nashriyotida ko‘p adadda chop etildi.
Salimjon Sodiqov 1982 yildan umrining oxirigacha Samarqand qishloq xo‘jalik institutining falsafa kafedrasi dotsenti, kafedra mudiri lavozimlarida ishladi. 1990 yilda betobligi sababli nafaqaga chiqqan.
Uning turmush o‘rtog‘i Ozoda Otaeva ham yetuk olima bo‘lib, MDUda doktoranturani o‘tab, falsafa fanining dolzarb mavzulari bo‘yicha ilmiy faoliyat olib borgan. U ham Samarqand qishloqxo‘jalik institutida ishlagan.
Falsafa fanlari doktori, professor S.Sodiqovning yorqin xotirasi uning shogirdlari va yaqinlari qalbida hamisha barhayotdir.
