Filologiya fanlari nomzodi, dotsent
1939 yil 25 avgustda Andijon viloyatining Shahrixon tumanidagi Nazarmahram qishlog‘d tug‘ildi. 10 - sinfni bitirib, bir necha yil jamoa xo‘jaligida mehnat qildi. 1962 - 1967 yillarda Toshket davlat universitetining o‘zbek tili va adabiyoti fakultetida ta’lim oldi. Qaytib kelib, bir yil qishlog‘idagi 36 - maktabda o‘qituvchi bo‘lib ishladi. Universitetda saboq bergan ustozlari G‘. Karimov, L. Qayumov, O. Sharafiddinov, S. Dolimov , U. Normatovlar izidan borish niyatida 1968 yili Andijon tillar institutining o‘zbek tili va adabiyoti kafedrasiga ishga o‘tdi.
1971 - 1974 yillarda Toshkent davlat universiteti o‘zbek adabiyoti kafedrasida aspirant bo‘lib, “Zamonaviy o‘zbek satirik hikoyachiligi va xarakter muammosi” mavzusidagi tadqiqot olib bordi. Aspiranturani tamomlagach, to‘rt yil Toshkent politexnika institutida o‘qituvchi, katta o‘qituvchi lavozimlarida ishladi. 1975 yilda ilmiy ish asosida “Satira tarbiya quroli “nomli risola chop ettirdi.
1978 yil sentyabridan Farg‘ona davlat pedagogika institutining o‘zbek adabiyoti kafedrasi katta o‘qituvchisi lavozimiga qabul qilindi.U katta niyatlar bilan kelgandi. 1983 - 1985 yillarda doktorlik dissertatsiyasini nihoyasiga yetkazish uchun 3 yillik izlanuvchi - tadqiqotchi sifatida ishladi. 1984 yilda “Satira san’ati” deb atalgan monografiyasini nashr ettirdi. Ammo bu ishni oxirigacha yetkazmay, 1989 yilda Farg‘ona politexnika institutiga ishga o‘tib ketdi. 1993 yili yana kafedraga ishga qaytdi. Olti yildan so‘ng pensiya yoshiga yetishi munosabati bilan o‘z arizasiga ko‘ra ishdan ozod qilindi.
S. Toshkanov xushchaqchaq, hazilkash do‘st edi. 2015 yilning 6 yanvarida 76 yoshida olamdan o‘tdi.
