Biologiya fanlari nomzodi, dotsent
1974 yil 19 yanvarda Farg‘ona viloyati Bag‘dod tumani Ultarma qishlog‘ida tavallud topgan. 1991 yilda tumandagi 20 - o‘rta maktabni tamomlab, shu yili Farg‘ona davlat universitetining agrokimyo va tuproqshunoslik yo‘nalishiga o‘qishga kirdi. 1996 yilda o‘qishni tamomladi. U 1996 - 1997 yillarda O‘zbekiston o‘simliklarni himoya qilish ilmiy - tadqiqot institutining Ultarma tayanch punktida ilmiy xodim sifatida faoliyatini boshladi. 1997 yildan Farg‘ona davlat universitetiga ishga taklif etildi va tuproqshunoslik kafedrasi tadqiqotchisi, aspirant , o‘qituvchi , katta o‘qituvchi, dotsent lavozimlarida faoliyat ko‘rsatdi.
2002 - 2003 yillarda Farg‘ona davlat universiteti aspirantura bo‘limi mudiri, 2009 - 2010 va 2014 - 2015 yillarda tibbiyot geografiya fakultetining o‘quv ishlari bo‘yicha dekan o‘rinbosari lavozimlarida samarali faoliyat olib bordi. 2015 yil yanvardan tuproqshunoslik kafedrasi mudiri vazifasini bajaruvchi lavozimida ishlab kelmoqda.
D. Xoldorov 2006 yil 5 aprelda tuproqshunoslik va agrokimyo ilmiy tadqiqot davlat instituti huzuridagi D.180.20.01 raqamli doktorlik ilmiy darajasini olish uchun dissertatsiyalar himoyasi bo‘yicha ixtisoslashgan Kengashda “Markaziy Farg‘onaning sho‘rlangan o‘tloqi saz tuproqlari va sho‘rxoklari geokimyosi” mavzusidagi 03.0027- Tuproqshunoslik ixtisosligi bo‘yicha dissertatsiyasini himoya qildi. O‘zbekiston Respublikasi Oliy attestatsiya Komissiyasining qaroriga muvofiq D. Xoldorovga 2012 yil 18 oktyabrda dotsent ilmiy unvoni berildi.
U kafedraning ilmiy ishlarini tashkillashda ham faol qatnashadi. Jumladan, kafedra a’zolari bilan hamkorlikda A – 7 - 445 raqamli DITD “Fag‘ona viloyati sug‘oriladigan tuproqlarining genetik - geografik shakllanish qonuniyatlarini o‘rganish va yer fondi tavsifi” mavzusidagi ilmiy - tadqiqot ishlarida qatnashib kelgan.
