Yunusov Adham Yunusovich (01.07.1910, Toshkent - 16.10.1971) - fiziolog olim. Oʻzbekiston FA akademigi (1952), Oʻzbekistonda xizmat koʻrsatgan fan va texnika arbobi (1960), biologiya fanlari doktori (1949), professor (1950). Oʻrta Osiyo Paxtachilik va ipakchilik intitutini (1932) hamda ToshTI ni (1943) tugatgan. ToshTI, Nizomiy nomidagi Toshkent pedagogika instituti, Toshkent qishloq xoʻjaligi instituti fiziologiya kafedralarida assistent (1932 - 1938), Farmatsevtika instituti fiziologiya kafedrasida dotsent, keyinchalik mudir (1938 - 1949), ToshTI fiziologiya kafedrasi mudiri (1948 - 1952). Oʻzbekiston maorif vaziri (1952 - 1953). Oʻzbekiston FA akademiyasi kotibi (1953 - 1956), Oʻzbekiston FA Zoologiya va parazitologiya instituti (hoz. Fiziologiya instituti) fiziologiya boʻlimi mudiri (1956 - 1971). Ilmiy ishlari odam va hayvon organizmidagi suvtuz almashinuvi regulyatsiyasidagi ovqat hazm qilish aʼzolarining ahamiyatini tekshirish, kimyoviy termoregulyatsiya, yuqori temperaturali sharoitda fiziologik funksiyalar mexanizmining oʻzgarishini oʻrganish va boshqalar ga oid. Yunusov tadqiqotlari asosida issiq sharoitda ishlaydiganlarning tuz isteʼmol qilish meʼyori, qoramoldan meʼda shirasi olish usuli ishlab chiqilgan.
