Abdirov Charjau Abdirovich (1933.20.12, Qoraqalpog‘iston Respublikasi Qorao‘zak shaharchasi - 1997.3.7, Nukus) - mikrobiolog olim. O‘zbekiston FA akademigi (1989), Qoraqalpog‘istonda xizmat ko‘rsatgan fan arbobi (1979). Tibbiyot fanlari doktori (1973). Toshkent tibbiyot institutini bitirgach (1955), shu institut mikro-biologiya kafedrasining assistenti (1958-1961), O‘zbekiston Respublikasi FA Qoraqalpog‘iston filialida katta ilmiy xodim (1961-1969), O‘zbekiston Teri-tanosil kasalliklari instituti Qoraqalpog‘iston filiali direktori (1969), Qoraqalpog‘iston Sog‘liqni saqlash vaziri (1969-1976), Nukus davlat universiteti rektori (1976-1985), O‘zbekiston FA klinik va eksperimental tibbiyot institutida bo‘lim mudiri va direktor (1985-1997). Asosiy ilmiy ishlari mikrobiologiya va immunologiya masalalariga bag‘ishlangan. O‘zbekiston Respublikasi Oliy Majlisining deputati va Oliy Majlisning Atrof muhit va tabiatni muhofaza qilish masalalari qo‘mitasi raisi (1994-1997).