Filologiya fanlari doktori, professor
1941 yil 10 aprelda Tojikiston Respublikasi Hisor tumani Dehqonobod qishlog‘ida tug‘ilgan.1959 yilda o‘rta maktabni tugatdi. 1960 yilda Qo‘qon davlat pedagogika institutining boshlang‘ich ta’lim metodikasi fakultetiga o‘qishga kirdi. 1965 yili mazkur institutni imtiyozli diplom bilan yakunladi. Shundan so‘ng O‘zbekiston Respublikasi Fanlar akademiyasi qoshidagi Til va adabiyot institutida laborant, kichik ilmiy xodim bo‘lib ishladi. Bu davr mobaynida institutning lug‘atchilik sektorida ham samarali faoliyat yuritdi Institut tomonidan tayyorlangan 65 ming so‘zni o‘z ichiga olgan “Imlo lug‘ati” ni tayyorlashda munosib hissa qo‘shdi. Xususan, chetdan kirgan so‘zlarning imlosini belgilashda katta izlanishlar olib bordi. 1968 yili shu institut qoshidagi aspiranturaga o‘qishga kirib, 1971 yili tamomladi va “Hozirgi o‘zbek tilida o‘xshatish va uni ifodalovchi vositalar”, mavzusida nomzodlik dissertatsiyasini muvaffaqiyatli yakunladi.
1971 yilda Farg‘ona davlat pedagogika instituti o‘zbek tilshunosligi kafedrasida o‘qituvchi lavozimida ish boshladi. Keyinchalik katta o‘qituvchi, kafedra dotsenti, o‘zbek tili kafedrasi mudiri, boshlangich talim metodikasi fakulteti va o‘zbek filologiyasi fakulteti dekani lavozimlarida ishladi. M. Mukarramov 1996 yilda universitetda nutq madaniyati kafedrasini tashkil etish tashabbusi bilan chiqdi hamda mazkur kafedraning tamal toshini qo‘ydi.
1985 yilda “Hozirgi o‘zbek adabiy tili ilmiy stilining semantik - funktsional aspekta” mavzusida doktorlik dissertatsiyasini yoqladi.
Uning uch monografiyasi va yigirmadan ortiq zamonaviy o‘zbek tili muammolariga oid maqolalari chop etil di. “Hozirgi o‘zbek adabiy tilining ilmiy stili”, “Nauchnыy stil uzbekskogo xudojestvennogo yazыka”, “O‘zbek tilida o‘xshatish” kabi ilmiy - nazariy jihatdan puxta monografiyalari ilmiy jamoatchilik o‘rtasida e’tibor topdi. Ustozning zahmatli mehnatlari uchun Mustaqillikning dastlabki yilida “Xalq maorifi a’lochisi” faxriy unvoni berildi. O‘zbek tili stilistikasi asoschilaridan biri bo‘lgan olimning “O‘zbek tilida o‘xshatish” nomli risolasi nashr etildi.
Professor M. Mukarramov o‘z tadqiqotlari va tinimsiz izlanishlari natijasida vodiydagina emas, balki butun respublikada stilistika maktabining asoschilaridan biriga aylandi. Ustoz yodi ilm ahli hamda shogirdlar xotirasida bir umr hurmat bilan saqlanib qoladi.
