Filologiya fanlari nomzdi, dotsent
1971 yil 1 aprelda Farg‘ona viloyati Furqat tumanida tug‘ilgan. 1987 yilda tumandagi 32 - o‘rta maktabni a’lo baholar bilan tamomladi. Kirish imtihonlaridan eng yuqori ball to‘plab, Farg‘ona davlat pedagogika instituti talabalari safidan o‘rin oldi. 1992 yilda Farg‘ona davlat universitetini imtiyozli diplom bilan tamomladi. O‘qituvchilik faoliyatini Furqat tumanidagi 3 - o‘rta maktabda boshladi. 1997 - 2007 yillarda FarDU qoshidagi 11 - litsey –internetda ona tili va adabiyot fani o‘qituvchisi sifatida faoliyat yuritdi.
1999 - 2000 llarda Farg‘ona davlat universiteti o‘zbek tilshunosligi kafedrasida shogrid - tadqiqotchi lavozimida ishladi. 2000 - 2003 yillarda Farg‘ona davlat universitetida 10.02.02. Milliy tillar (o‘zbek tili) mutaxassisligi bo‘yicha aspiranturada tahsil oldi. Bir necha yillik ilmiy izlanishlari samarasi sifatida 2005 yil 18 mayda filologiya fanlari doktori, professor M. Mirtojiyev rahbarligida “Alisher Navoiy g‘azallari maqta’sida sabab va oqibat munosabatining ifodalanishi” mavzusidagi nomzodlik dissertatsiyasini muvaffaqiyatli himoya qildi.
U 2007 yildan boshlab Farg‘ona davlat universiteti o‘zbek tilshunosligi kafedrasi katta o‘qituvchi, 2012 yildan esa tilshunoslik kafedrasi dotsenti lavozimida ishlab kelmoqda.
Dotsent N. Umarovaning Alisher Navoiy g‘azallari badiiy til xususiyatlari hamda badiiy matn tadqiqiga bag‘ishlangan 50 ga yaqin ilmiy maqolalari nufuzli jurnallarda, ilmiy anjuman to‘plamlarida chop etilgan. Olima “Alisher Navoiy - badiiy so‘z ustasi”, “Shavkat Rahmon she’rlarida komparativ ko‘chimlarning qo‘llanilishi”, “Badiiy matnni leksik - semantik guruhlar asosida o‘rganish”, “Kitob va idrok” kabi o‘quv - uslubiy qo‘llanma hamda “Navoiy g‘azaliyotida sabab va oqibat munosabatining mazmuniy hamda konstruktiv shakllari” nomli monografiyalar muallifi hamdir.
