Geografiya fanlari nomzodi, dotsent
1941 yil 25 sentyabrda Farg‘ona viloyatining Rishton tumanidagi Beshkapa qishlog‘ida tug‘ilgan. 1957 yilda Toshkent davlat universitetining geografiya fakultetiga o‘qishga kirib, 1962 yilda tamomlagan. 1962 - 1967 yillarda Rishton tumanidagi 5 - o‘rta maktabda geografiya o‘qituvchisi va ilmiy bo‘lim mudiri bo‘lib ishladi. 1967 yildan boshlab Farg‘ona davlat pedagogika institutida geografiya fani o‘qituvchisi, katta o‘qituvchi va dotsent lavozimlarida faoliyat olib borgan.
Isomiddin Abdug‘aniyev O‘zbekistonda birinchilardan bo‘lib neft - gazli tektonik tuzilmalarni qidirishda landshaft indikatsiyasi tadqiqot usulini ishlab chiqqan va amaliyotda qo‘llagan. Bu yo‘nalish bo‘yicha u 1970 yillarda boshlab ilmiy tadqiqotlar olib bordi. Ilmiy tadqiqotlari davomida, tektonik tuzilmalarning landshaft indikatorlarini o‘rganish orqali, Farg‘ona vodiysi xududida neft va gaz konlari mavjud bo‘lgan maydonlarni aniqlab berdi. Shuningdek, tabiiy muhit monitoringida landshaft indikatorlaridan foydalanish bo‘yicha tavsiyalar ishlab chiqdi.
I. Abdug‘aniyev 1976 yilda Moskva davlat universiteti ilmiy Kengashida professorlar T.V. Zvonkova va S.V. Viktorovlar rahbarligida “Farg‘ona” vodiysining janubiy qismida neft va gazli tuzilmalarning landshaft indikatorlari mavzusida nomzodlik dissertatsiyasini yoqladi. I.Abdug‘anyiev rahbarligida 1983 - 1985 yilarda “Landshaftlarning geoximik xususiyatlari bilan bog‘langan chorva mollaridagi endemik kasalliklar va ularning indikatsion belgilari hamda profilaktikasi” mavzusi xo‘jalik bitimi bo‘yicha ilmiy - tadqiqot ishlari olib borildi. Natijada, bu ishlari uchun O‘zbekistan qishloq xo‘jaligi vazirligining patentiga eta bo‘ldi.
Shuningdek, 1990 - 1998 yillarda geografiya kafedrasi mudiri lavozimida faoliyat olib bordi. Ustoz 150 dan ortiq ilmiy va uslubiy ishlarni e’lon qildi. Ular orasida oliy o‘quv yurtlari geografiya fakulteti talabalari uchun “Umumiy yer bilimidan laboratoriya mashg‘ulotlari” (1986), “Geografiya darslarida o‘quv texnika vositalaridan foydalanish” (1990), “Geomorfologiya asoslari” (2002), “Umumiy yer bilimi” (2006), “Qiziqarli geografiya” (2007) kabi o‘quv qo‘llanma, darslik, o‘quv - uslubiy ko‘rsatma va risolalarni ko‘rish mumkin.
Uning bevosita rahbarligida ilmiy ishini boshlagan 4 nafar shogirdlari (R. Xoliqov, U. Obidov, O. Abduganiyev, R. Pirnazarov) fan nomzodi, 1 nafari (Yu.Ahmadaliyev) fan doktori ilmiy darajasiga ega bo‘ldilar. Ko‘p yillik ilmiy - pedagogik faoliyati. davomida tayyorlagan shogirdlari hozirgi kunda yirik korxonalarda, oliy ta’lim mussasalarida mehnat qilmoqdalar.
