Boboxonova Halima Abshiyevna, 26 aprel 1963 yilda Toshkent viloyatining G‘azalkent shahrida tug‘ilgan. Toshkent to‘qimachilik va yengil sanoat instituti, matbaa ishlab chiqarish texnologiyasi va dizayn kafedrasi dotsenti, texnika fanlari nomzodi.
“Oyijon, meni tabriklang, maktabni oltin medalga tugatdim.” – uyga ohuday yugurib kirgan Halimaxon o‘zini onasining bag‘riga otdi.
Umringdan baraka top, qizim. Yuzimni yorug‘ qilding. Men kenjatoyim ancha erka - da, deb doim xavotirda yurardim. Ilohim, bundan keyin ham o‘qishlaring, ishlaring hamisha besh bo‘lsin, meni quvontirib yuzimni yorug‘ qilib yurgin, - ko‘zida yosh bilan ko‘zlari chaqnab turgan qizini peshonasidan beozor o‘pdi.
Halima shunda besh farzandni yolg‘iz ardoqlab, ham ota, ham ona bo‘lib, mehnatkash, odobli qilib voyaga yetkazgan onasi sochlariga oq oralaganini anchagina xorg‘in bo‘lib qolganligini his qildi.
- Oyijon, endi siz ishlamaysiz, opalarim , akam - biz ishlaymiz. Siz endi dam oling, - dedi Halima oyisini quchib.
- Yo‘g‘ - e, bolam, hali qiladigan ishim ko‘p. Akangni uylantiramiz, opangni uzatamiz. Sen bularni o‘ylama. Sen o‘qishga bor, ko‘nglingdagi institutga kirib olsang, meni charchoqlarim chiqib ketadi. Niyatim, sen ham opa - akalaringa o‘xshab oliy ma’lumotli bo‘l, yurt koriga yara. Otang rahmatlini vasiyati bu, - qizini quchog‘idan bo‘shatdi ona. Endi sen sabzi art, osh qilamiz, opalaring kelsa, oltin medalingni yuvamiz.
Bu duo, bu orzu Halimaxonga qanot bo‘ldi. Ko‘p o‘tmay G‘azalkentdagi 3 - maktabning sobiq o‘quvchisi Halima Abshiyevna Toshkent to‘qimachilik va yengil sanoat institutining a’lochi talabasiga aylandi. Chaqqon, bilimga tashna, ustozlarining suyukli talabasiga aylangan Halimaxon baxtini ham shu yerda topdi. Kursdoshi Avazjon unga sovchi qo‘ydi. Institutni tugatgach 1985 yilda ularning to‘yi bo‘ldi. Hamkasb kelin - kuyovlar Toshkentdagi 3 - bosmaxonada birga ish boshladilar. Ustozlaridan olgan bilimlarini amaliyotga muvaffaqiyatli tadbiq etgan yoshlar rahbarlar nazariga tushdi. Halimaxonning iqtidorini yaxshi bilgan ustozlari qadrdon institutiga ishga taklif qilishdi. U “matbaa ishlab chiqarish texnologiyasi” kafedrasiga assistent bo‘lib ishga kirdi. Yosh mutaxassis talabalarga dars berish barobarida o‘zi ham juda ko‘p o‘qidi, o‘rgandi. 1996 yilda Halima Boboxonova katta o‘qituvchi lavozimiga o‘tdi. Bu paytda mustaqillik sharofati bilan O‘zbekistonga dunyo darvozalari keng ochilgan edi. Ta’lim tizimida ham ulkan islohatlar boshlangan edi. 1998 yil Halima Abshiyevna Printpromoshen granti sifatida Germaniyadagi Berg Universitetida uch oylik tajriba almashishga bordi, bu safar unga ilmiy ishning bir qismini yozishga imkon ham bergan edi. U 2000 yilda professor H.Alimova rahbarligida O‘zbekistonda birinchi bo‘lib “Matbaa ishlab chiqarish texnologiya mashina va agregatlari” ixtisosligi bo‘yicha “Ipak va kanop qo‘shilgan qog‘ozning bosma xususiyatlari” mavzuidagi nomzodlik dissertatsiyasini birinchi bo‘lib muvaffaqiyatli himoya qildi.
Dunyo ko‘rgan kishi dunyolar yaratadi. Halimaxon ham bakalavr talabalari, magistrant shogirdlari qalbida ham matbaachilikning o‘ziga xos dunyosini kashf etdi. U kasbining sir - asrorlarini, bugungi taraqqiyotini, yurtimizda bu sohada qo‘lga kiritilgan yutuqlar , bo‘lajak matbaachilarning oldidagi turli vazifalar, tekshirishlarini bildiradi.
Yakuniy malaka ishi himoyasi bo‘yicha davlat attestatsiya komissiyasi a’zosi sifatida malakali kadrlar tayyorlashga munosib hissa qo‘shayotgan ustoz - olima 2001 yilda kafedra dotsenti bo‘ldi.
Halima Boboxonova 2005 “Istedod” jamg‘armasi granti g‘olibi bo‘lgach, Xitoydagi Shanxay universitetida malaka oshirish imkoniyatini qo‘lga kiritdi. 2006 yilda Germaniya o‘zaro ilmiy xodimlar almashish Akademiyasi DAAD granti sovrindori bo‘lib, dunyoga mashhur Berg Matbaa universitetida ikki oy ilmiy tadqiqot olib bordi. Bu esa olimaning bilimiga bilim qo‘shgani, tajribasini boyitgani shubhasiz. O‘z navbatida pedagog – olima o‘z bilim tajribasini yurtimiz matbaachiligi sanoati rivojlanishiga tadbiq qilmoqda. Ular bayon qilingan 88 ta ilmiy, 20 ta o‘quv uslubiy, 4 ta o‘quv qo‘llanma, 4 ta darslik , bugungi kunda shu soha mutaxassisi va xizmatchilarini dasturi amaliga aylangan, desam mubolag‘a bo‘lmaydi.
Uning “Yilning eng yaxshi darsligi va o‘quv adabiyoti muallifi” Respublika tanlovida “Bosma qolip tayyorlash texnologiyasi” o‘quv qo‘llanmasi II darajali diplom bilan taqdirlangani fikrimizga isbot bo‘lishi shubhasiz.
Halima Abshiyevna bugun institutining nufuzli fakultetida faoliyat yuritadi. Fakultetda qo‘lga kiritilayotgan har bir yutuqda uning munosib xizmati bor. Talabalar turar joyi , fakultetning barcha o‘quv xonalarini to‘liq ta’mirdan chiqarishdi. Tinib tinchimagan rahbar Respublika va chet el turdosh institutlar va yetuk korxonalar bilan uzviy aloqa o‘rnatgan.
Halimaxon ishdan qaytgach, oila davrasida ham matbaachilik mavzusidagi suhbatlar davom etadi. Chunki turmush o‘rtog‘i Avazjon “Idea Print” korxonasi bosh muhandisi Toshkent to‘qimachilik va yengil sanoat institutini magistraturasini tugatgan o‘g‘li Shuxrat “Davlat belgisi” korxonasida usta, qizi Madinaxon ham xuddi shu soha magistraturasini bitirdi. Bir - birini tushunib, bir - birini qo‘llab, yashayotgan bunday oilada ham, ular xizmat qilayotgan korxonada ham muvaffaqiyatlar, yutuqlar bo‘lishi shubhasiz. Chunki ahillik totuvlik bor joyda baraka butun.
Halimaxon bu yutuqlardan, baxtiyorlikning bosh garovi onasining duosida deb biladi. Ich - ichidan onasidan minnatdor bo‘ladi.
