Filologiya fanlari nomzodi, dotsent
1910 yil 25 dekabrda Qo‘qon shahrida tug‘ilgan. 1927 - 1931 yillarda o‘qituvchilar tayyorlash bilim yurtida o‘qidi.1931 - 1935 yillarda YaRishton tumanidagi 1 - maktabda ishladi. 1935 - 1939 yillari Farg‘ona davlat pedagogika institutining o‘zbek tili va adabiyoti fakultetida ta’lim oldi. O‘zbek mumtoz adabiyoti hamda adabiyot nazariyasi fanlaridan darslik va qo‘llanmalar yaratgan professor A.Sa’diy A.Ibrohimovni ilmiy - tadqiqot ishlariga jalb etdi. 1939 yil institutni imtiyozli tugatgan yosh tadqiqotchi kafedrada ishga olib qolindi. 1950 yilda “Muhammad Solih ijodi va uning “Shayboniynoma” asari” mavzusidagi nomzodlik dissertauiyasini yoqladi. 1954 yilda dotsentlik unvonini oldi.
A.Ibrohimov Sharq va o‘zbek mumtoz adabiyotini chuqur o‘zlashtirgan yetuk olim edi. U Firdavsiyning “Shohnoma”, Yassaviy “Hikmatlar”i, Lutfiy, Navoiy g‘azallari va dostonlarini yoddan o‘qib tahlil qilar, talabalardan ham yodlashni talab qilardi. Olim, ayniqsa, o‘zi ilmiy tadqiqot ishi olib borgan XVI-XVII asrlarda yashab ijod qilgan Muhammad Solih, Bobur, Majlisiy kabi adiblar merosini juda yaxshi bilar, ularni buzib talqin qilayotgan ayrim olimlarga dadil qarshi chiqardi. Masalan, Bobur va Shayboniyxon o‘rtasidagi taxt talashish jarayonini, ularning obrazini yaratishda Muhammad Solih realistik pozitsiyada turganligini aniq misollar asosida tushuntirib berardi. Shuningdek, ustoz Majlisiy tomonidan yaratilgan doston nomi ayrim adabiyotshunoslar aytganidek, “Qissai Sayfulmalik” emas, balki shoir asaridan olingan misollar asosida “Qissai Sayfulmuluk” ekanligini isbotlab berdi.
Ustoz adabiyotshunos kommunistik mafkura g‘oyat avjiga chiqqan, xalqimiz tarixi, madaniyati, adabiyoti va san’ati kamsitilgan XX asrning 60 - yillarida ham Yassaviy, Boqirg‘oniy, Rabg‘uziy, Bobur, Huvaydo kabi ijodkorlar merosi to‘g‘risida ishtiyoq bilan dars bergan. A.Ibrohimov intiluvchan yoshlarga mehribon ustoz bo‘lib, M.Madg‘oziev, M.Abdullaev, Y.Solijonov singari mutaxassislarni ilm yo‘liga olib kirgan.
