Toshkent Davlat Iqtisodiyot universitetining “Tashqi iqtisodiy faoliyat” kafedrasi professori, iqtisod fanlari doktori Karriyeva Yaqutxon Karimovna mamlakatimizni yanada gullab yashnashi yo‘lida mexnat qilishga qodir bo‘lgan malakali, bilimli mutaxassislarni tayyorlash va tarbiyalash borasida sidqidildan mexnat qilib kelyapti. U O‘zbekistonda logistika tamoyillariga asos solgan olimadir. Ilmiy ishlarining asosiy yo‘nalishlari iqtisodiy tizimlar faoliyatini optimallashtirish, marketing - menejment, transport va logistikaga bag‘ishlangan bo‘lib, mustaqillik yillarida samarali ilmiy faoliyat olib borib, mamlakatimizda ushbu fanlarning rivojlanishiga va yoshlarning intellektual salohiyatini oshirishga katta hissa qo‘shgan.
2005 - 2009 yillarda TDIU va TDTU qoshidagi ixtisoslashgan kengash a’zosi, TDIU xotin - qizlar qo‘mitasi raisi muovini, 2004 - 2011 yillarda TDIU ilmiy kengashi a’zosi, 2009 yilda “O‘zbekiston - Amerika do‘stlik jamiyati” a’zosi bo‘lgan. U doimo izlanuvchi iqtisodchi olima bo‘lishi bilan bir qatorda o‘zining huquqiy bilimlarini ham oshira borib, 2006 yilda ikkinchi mutaxassislik bo‘yicha TDYuI ni tugatgan va advokatlik litsenziyasiga ega. 2006 yilda O‘zbekiston Respublikasi Bosh Vazirining xotin - qizlar masalalari bo‘yicha o‘rinbosari tomonidan faxriy yorlig‘i, 2008 yilda TDIU rektori tomonidan faxriy yorlig‘i, 2011 yilda OO‘MTVning faxriy yorlig‘i bilan taqdirlangan.
O‘tgan yillar davomida ilmiy ishlari yuzasidan Germaniya (Gamburg porti va Gyote universiteti), Frantsiya (Parij, Merlibax, Forbax shahrida), Turkiya (Anqara universiteti, Mersin porti), Misr Arab respublikasi (Qohira universiteti, Sayid porti), Birlashgan Arab amirliklari (Abu Dabi Zeyd porti)da bir qancha konferentsiya va simfoziumlarda qatnashgan. 2010 yilda OBSYe xalqaro tashkilotining “O‘zbekistonda Transport logistikasi sohasida milliy kadrlarning bilim va tajribasini oshirish” deb nomlangan loyihasiga ushbu soha bo‘yicha doktorlik ilmiy ishini yoqlagan olima sifatida rasman taklif qilingan va loyiha talablari asosida “Osnovi i osobennosti transportnoy logistiki” nomli o‘quv - uslubiy qo‘llanma chop etilgan.
Professor Karriyeva Yakutxon Karimovna shu paytgacha 5 ta monografiya, 3 ta darslik, 15 ta o‘quv ko‘llanma, 3 ta risola, 75 ta ilmiy ishlar, 67 ta uslubiy ishlar muallifidir. Shuningdek, bir qancha ilmiy maqola va tezislari xorijiy mamlakatlarda chop etilgan. Uning 2006 - 2012 yillarda nashr qilingan “Xalqaro marketing”, “Xorijiy investitsiyalar”, “Tashqi iqtisodiy faoliyatni boshqarish”, kasb-hunar kollejlari uchun “Investitsiyalar va lizing asoslari “, “Zamonaviy xalqaro marketing”, “Investitsiyalar va lizing faoliyati”, magistraturada “Jahon bozori konyunkturasi tahlili”, “Tashqi iqtisodiy faoliyat, transport ta’minoti”, “Tashqi iqtisodiy faoliyatda kommunikatsiyalar tizimi”, “Xalqaro transport tashuvlari”, “Osnovi osobennosti transportnoy logistiki”, “Zamonaviy logistika” kabi fanlardan o‘quv qo‘llanma, darsliklari, “Globallashuv jarayon da xalqaro transport logistik tizimi faoliyatining samaradorligi” kabi monografiyalari soha mutaxassislari uchun muhim qo‘llanma bo‘lib kelmoqda.
Yakutxon Karriyevaning 30 dan ziyod shogirdlari yurtimizdagi nufuzli oliygohlarda hamda qator vazirlik va tashkilotlarda faoliyat ko‘rsatib, transport va logistika, tashqi iqtisodiy faoliyat, tashqi savdo aloqalarining marketing va menejment asoslari bag‘ishlangan ilmiy izlanishlar olib bormoqdalar.
Professor Yakutxon Karimovna o‘z kasbi va ilm – fan fidoyisi, mehribon va jonkuyar ustoz, bilimli va kamtarin olima, yuksak madaniyat va hurmatga sazovor inson. Oilali, nabiralari va farzandlari uchun mehribon ona.
Professor Yakutxon Karriyevaning asosiy ilmiy ishlari:
1. Xorijiy investitsiyalar. O‘quv qo‘llanm (IQTISODIYOT, 2010. Toshkent. 2010 y). 2. Xalqaro yo‘nalishlarda yuk tashish samaradorligini aniqlash mezonlari O‘zbekistonda bojxona ishining dolzarb muammolari; nazorat va amaliyot. Respublika ilmiy amaliy anjumani (Toshkent, 2010 yil). 3. Tashqi iqtisodiy faoliyatda transport ta’minoti. Darslik (TDIU, Toshkent, 2010). 4. Globallashuv jarayonida xalqaro transport logistik tizimi faoliyaning samaradorligi (Monografiya, TDIU, Toshkent 2011). 5. Qishloq xo‘jaligida transport logistikasini qo‘llash masalalari. “Qishloq xo‘jaligi, raqobatbardoshlikni oshirish yo‘llari” xalqaro ilmiy-amaliy konferentsiya (T:.TDIU., 2014).
Albatta zabardast olimaning ilmiy faoliyati haqida ko‘plab yozish mumkin. Asosiysi professor Yakutxon Karriyeva iqtisod sohasiga, ilm – fan rivojiga o‘z hissasini qo‘shayotgan fidoyi olimalardan.
