Tarix fanlari doktori, professor Sh. Mahmudbekov 1949-yil 10-avgustda Toshkentda tug‘ilgan. Millati o‘zbek. 1971-yil Toshkent davlat universiteti sharq fakultetining arab filologiyasini tamomlagan. Olim 1971–1973-yillarda Misr Arab Respublikasida xizmatda bo‘lib, tarjimon lavozimida ishladi. 1973–1977-yillarda sobiq SSSR FA Sharqshunoslik instituti aspiranturasida tahsil olgan. Sh. Mahmudbekov “Положение рабочего класса и рабочее движение в Египте (1952-1970 гг.)” mavzusida nomzodlik, 1991-yilda esa “Классы и политические партии Египта в борьбе за независимость (1918-1970 гг.)” mavzusida doktorlik dissertatsiyalarini himoya qildi. 1977-yildan 1988-yilgacha ToshDU sharq fakulteti xorijiy sharq mamlakatlari tarixi kafedrasida o‘qituvchi, katta o‘qituvchi va 1986-yildan dotsent lavozimida xizmat qilgan. 1993-yilda unga professor ilmiy unvoni berildi. Olim 1992–1994-yillarda Toshkent davlat sharqshunoslik instituti Umumiy tarix kafedrasining mudiri bo‘lgan, ayni paytda kafedra professori. Ilmiy yo‘nalishi — xorijiy sharq mamlakatlari tarixi, rivojlangan G‘arb va Sharq mamlakatlarining davlat tuzumi hamda iqtisodi. Olim ToshDShI qoshida tashkil etilgan tarix, falsafa va siyosatshunoslik fanlari bo‘yicha ixtisoslashgan ilmiy kengashning a’zosi. Sh. Mahmudbekov 2 monografiya va 20 dan ortiq ilmiy maqolalar muallifi.