Yuqoridagi matnda rus tilidagi dissertatsiya mavzulari kirill alifbosida qolgan edi. Quyida barcha so‘zlar to‘liq lotin alifbosiga o‘girilgan variant:
Tarix fanlari doktori, professor R.H. Murtazayeva 1950-yil 20-mart kuni Namangan shahrida tavallud topgan. Millati o‘zbek. 1972-yilda ToshDUning tarix fakultetini tamomlagan.
Olima 1972–1975-yillar davomida ToshDUning aspiranturasida o‘qigan. 1975-yilda “O‘zbekiston mehnatkashlarining baynalminal tarbiyasi” mavzusida nomzodlik, 1990-yilda esa “O‘rta Osiyo respublikalaridagi millatlararo munosabatlarning iqtisodiy asosi” mavzusida doktorlik dissertatsiyalarini himoya qilgan.
R.H. Murtazayeva 1976-yildan mehnat faoliyatini ToshDUda boshlab, to hozirgi kunga qadar ilmiy-pedagogik faoliyatini ushbu dargoh (O‘zbekiston Milliy universiteti) bilan chambarchas bog‘ladi.
R.H. Murtazayeva 1993-yildan to hozirgi kunga qadar O‘zMU tarix fakulteti “O‘zbekiston tarixi” (sobiq fakultetlararo) kafedrasi mudiri lavozimida uzluksiz ravishda faoliyat ko‘rsatmoqda.
R.H. Murtazayeva 1995–2004-yillar mobaynida Mirzo Ulug‘bek nomidagi O‘zbekiston Milliy universiteti ma’naviy-ma’rifiy va gumanitar ta’lim ishlari bo‘yicha birinchi prorektori lavozimida faoliyat ko‘rsatib, respublika ta’lim tizimi sohasida, Kadrlar tayyorlash Milliy dasturini hayotga tatbiq etishga munosib hissasini qo‘shdi. Shu davrda universitet ta’lim va o‘qitish tizimidagi ko‘plab ijobiy o‘zgarish va yangilanishlarda olimaning hissasi katta bo‘ldi.
O‘zbekistonda millatlararo munosabatlar, kam sonli millatlar va bag‘rikenglik, tarixiy-demografik jarayonlar, ta’lim tizimi masalalari olimaning asosiy ilmiy yo‘nalishi hisoblanadi. Uning tashabbusi bilan 2006-yili universitetda “Millatlararo totuvlik va bag‘rikenglik” ilmiy markazi ochildi. Olima “Millatlararo munosabatlar va bag‘rikenglik tarixi” ilmiy maktabining asoschisi hisoblanib, bu sohada ko‘plab salmoqli ishlarni amalga oshirdi.
R.H. Murtazayevaning ilmiy rahbarligida hozirgi kunga kelib 10 nafar tadqiqotchi doktorlik va 20 nafar tadqiqotchi nomzodlik dissertatsiyasi ustida o‘z ilmiy-tadqiqot ishlarini samarali ravishda davom ettirmoqdalar. Hozirgi davrga qadar professor R.H. Murtazayeva rahbarligida 3 nafar fan doktori, 25 nafar fan nomzodlari tayyorlangan.
Uzoq yillar samarali ilmiy va pedagogik faoliyati munosib baholangan holda olima 1995-yili O‘zbekiston Respublikasining “Shuhrat” medali bilan taqdirlangan.
R.H. Murtazayeva mustaqillik davrida respublikada birinchilardan “O‘zbekiston tarixi” fanini oliy ta’lim o‘quv dasturiga kiritish tarafdori bo‘lib, uning rahbarligida ilk bor milliy istiqlol ruhi aks etgan, avvalo, O‘zbekiston tarixidan ma’ruzalar matni, so‘ngra o‘quv qo‘llanma va darsliklar nashr etildi. Bu o‘z navbatida olimani va uning boshchiligidagi ilmiy-pedagogik jamoani 2000-yili O‘zbekiston Respublikasi Oliy va o‘rta maxsus ta’lim vazirligining “Oliy ta’lim a’lochisi” ko‘krak nishoni bilan taqdirlanishiga sabab bo‘ldi.
Milliy universitet tarixi mavzusi R.H. Murtazayeva rahbarlik qilayotgan kafedra jamoasi ilmiy yo‘nalishlaridan biri hisoblanadi. Shu bois universitetning qator tavallud yoshlariga bag‘ishlangan adabiyot va risolalarda olimaning katta hissasi bor. Jumladan, 2008-yili O‘zMU tavalludining 90 yilligiga bag‘ishlangan xalqaro anjumanda R.H. Murtazayevaning chiqishi ilmiy jamoatchilikda katta qiziqish uyg‘otdi.
Olima bir necha yillardan buyon bevosita ilmiy fundamental va innovatsion loyihalarda ishtirok etib kelmoqda. O‘zbekiston Respublikasi Vazirlar Mahkamasi huzuridagi Fan va texnologiyalar Markazining 2005-yil 27-dekabrdagi farmoyishiga ko‘ra “O‘zbekistonda demokratik jarayonlar va millatlararo bag‘rikenglik: tarix va hozirgi zamon” kitobi uchun professor R.H. Murtazayeva kitobning hammualliflari bilan birgalikda 2005-yilgi tanlovining “Jahon fani yutuqlari darajasida bajarilgan fundamental tadqiqotlar” tanlovining g‘olibi bo‘lgan.
2008-yili may oyida professor R.H. Murtazayeva Xitoy poytaxti Pekinda joylashgan Millatlar Markaziy universiteti ilmiy jamoatchiligiga, magistrant, aspirant va doktorantlariga “O‘zbekistonda millatlararo munosabatlar va bag‘rikenglik” mavzusida ma’ruzalar turkumini o‘qidi.
Olima 2001–2004-yillarda Xalq deputatlari Toshkent shahar kengashi deputati sifatida poytaxt ijtimoiy-siyosiy hayotida faol ishtirok etdi. R.H. Murtazayeva 1996–1998-yillarda O‘zbekiston Respublikasi FA Tarix instituti huzurida faoliyat ko‘rsatayotgan D.015.09.01 raqamli Birlashgan Ixtisoslashgan kengash raisi muovini, hozirgi kunga qadar shu kengash a’zosi, shuningdek, institut huzuridagi Muvofiqlashtiruvchi kengash a’zosi hamdir. Professor R.H. Murtazayeva 1999-yildan to hozirgi kunga qadar uzluksiz ravishda O‘zbekiston Milliy universiteti huzurida faoliyat ko‘rsatayotgan K.067.02.12 raqamli Ixtisoslashgan kengash raisi sifatida respublikada ilmiy kadrlar tayyorlash jarayoniga munosib hissasini qo‘shib kelmoqda.
Olima 2008-yildan beri Oliy va o‘rta maxsus ta’lim vazirligi qoshidagi Muvofiqlashtiruvchi kengashning gumanitar fanlar bo‘yicha o‘quv-uslubiy komissiyasi raisi.
R.H. Murtazayeva 2009-yil may oyidan O‘zbekiston Respublikasi Xotin-qizlar “OLIMA” uyushmasi raisi lavozimida faoliyat ko‘rsatib kelmoqda. Shuningdek, olima “Zulfiya” mukofotini taqdim etish bo‘yicha Davlat komissiyasi hamda O‘zbekiston Respublikasi xotin-qizlar qo‘mitasi Rayosatining a’zosi.
R.H. Murtazayeva bir qator xalqaro va respublika miqyosidagi anjumanlarda faol ishtirok etib kelmoqda. Jumladan, Italiya (Bolonya), Germaniya (Darmshtadt), Xitoy Xalq Respublikasi (Pekin), Rossiya (Saransk), Qozog‘iston (Olmaota)da bo‘lgan xalqaro anjumanlarda, Xiva, Buxoro, Samarqand, Marg‘ilon, Toshkent shaharlari yubileylariga bag‘ishlangan xalqaro konferensiyalarda ma’ruzalar bilan ishtirok etgan. Oliy ta’lim sohasi jarayonlarida faol ishtiroki uchun O‘zbekiston Milliy universitetining “Yuksak xizmatlari uchun” ko‘krak nishoni bilan taqdirlangan.
Professor R.H. Murtazayeva tashabbusi va rahbarligida bir qator respublika va xalqaro miqyosda ilmiy-amaliy anjumanlar tashkil qilindi. U tomonidan yaratilgan “O‘zbekistonda millatlararo munosabatlar va bag‘rikenglik” fani Oliy va o‘rta maxsus ta’lim vazirligi tomonidan 2007/2008 o‘quv yilidan boshlab respublika oliy o‘quv yurtlari tarix fakultetlari magistrantlari uchun asosiy fan sifatida o‘qitilib kelinmoqda.
Professor R.H. Murtazayeva 200 dan ziyod ilmiy, o‘quv-uslubiy ishlariga ega.