Filologiya fanlari doktori, professor
1944 yil 1 aprelda Andijon viloyati Shahrixon tumanida tug‘ildi. O‘rta maktabni tamomlagach , 1963 yilda Farg‘ona davlat pedagogika institutining tarix - filologiya fakultetiga o‘qishga kirdi. Bir yildan so‘ng harbiy xizmatga chaqirildi. Xizmatni o‘tab qaytgan B. Sarimsoqov o‘qishni davom ettirdi va 1970 yilda imtiyozli diplom bilan tamomladi.
Institutni bitirgandan keyin B. Sarimsoqov ilmiy ish qilish niyatida Toshkentga keldi va 1970 yil oktyabridan O‘zbekiston Fanlar akademiyasi Til va adabiyot institutining follor bo‘limiga laborant bo‘lib ishga kirdi. Uch ilga yetmay “Ssaj va uning o‘zbek folklorida tutgan o‘rni” mavzusidagi nomzodlik dissertatsiyasini muvaffaqiyatli himoya qildi(1973 yil 28 may). Yosh ilmiy xodim tirishqoqligi , tinmay bilimga intilishi bilan Xodi Zarif , Izzat Sulton , To‘ra Mirzayev, Muzayyana Alaviya, Mansur Afzalov singari fan darg‘alarining mehrini qozondi. U o‘zini faqat folklorist deb bilmas, adabiyotshunoslikning barcha sohalarini chuqur o‘rganishga harakat qilardi.
1978 yilda”O‘zbek adabiyotida” monografiyasini e’lon qilgach , qisqa fursatda “Adabiyotshunoslik terminlarining ruscha – o‘zbekcha izohli lug‘ati”ni tayyorlab, filologiya fanlari nomzodi N.htamov bilan hamorlikda nashr ettirdi(1979). Keyingi yillarda bir necha marta qayta bosilgan bu lug‘at qariyb o‘ttiz yil mobaynida oliy va o‘rta maxsus o‘quv yurtlari talabalari maktab o‘quvchilari va o‘qituvchilari uchun asosiy qo‘llanma bo‘lib xizmat qildi. 1986 yilda esa “O‘zbek marosim folklori” nomli monografiyasi dunyoga keldi va shu yili filologiya fanlari doktori ilmiy darajasini olish uchun dissertatsiya yoqladi.
B. Sarimsoqov adabiy jarayonni sinchkovlik bilan kuzatib boradigan, yuz berayotgan yangiliklarni tez ilg‘ab oladigan va darhol ularga munosabat bildiradigan olim edi. Bu fikrimizni uning adabiyotshunos E.Ochilov bilan olib borgan “Hozirgi o‘zbek she’riyatining taraqqiyot tamoyillari” haqidagi ilmiy - adabiy muloqoti (“O‘zbek tili va adabiyoti” jurnali, 2005 yil 3 - son), “Absurd ma’nisizlikdir” sarlavhali o‘ta munozarali maqolasi (“UzAS”, 28.06.2002) ham isbotlaydi. Shu bilan birga, o‘zbek adabiyotshunoslari orasida birinchi bo‘lib “Adabiy turlar haqida mulohazalar”ini bildirgan olim ham aynan B.Sarimsoqovdir (“O‘zbek tili va adabiyoti” jurnali, 1993 yil 5-6-sonlar). Unda fanning rivojlanishini ko‘zlab, yangi fikr va farazlar bildirishga ahd qilgan olim ilmiy jamoatchilikka to‘rtinchi - paremiya turini tavsiya qiladi.
2004 yilda “Badiiylik asoslari va mezonlari” nomli risolasini yaratdi. Bu asar olimning nazariy bilimi nihoyatda keng va chuqur ekanligini yana bir bor isbotladi. Hayotining so‘nggi o‘n yilida institutning adabiyot nazariyasi bo‘limini mahorat bilan boshqardi. Bo‘limni qabul qilib olgan B. Sarimsoqov “Adabiyot nazariyasi” fanining 3 jildlik fundamental - akademik nashrini tayyorlashga kirishdi. Bu ulkan tadqiqotni amalga oshirishga viloyatlardagi yetuk va tajribali olimlarni ham jalb etdi. Afsuski, bu xayrli ish tashabbuskor olimning bevaqt vafot etishi tufayli nihoyasiga yetmay qoldi.
O‘zi ta’lim olgan Farg‘ona davlat universiteta rektorati uni 2001 yilda ilmiy salohiyatni yanada oshirish, yosh tadqiqotchilarni ilmiy ishga ko‘proq jalb etish, magistratura ochish niyatida o‘rindoshlik yo‘li bilan o‘zbek adabiyotshunosligi kafedrasi professori lavozimiga taklif qildi. 2006 yilgacha talabalar va magistrlarga saboq berib, kafedra a’zolarining ilmiy ishiga rahbarlik qildi. Tez orada buning samarasi ko‘zga tashlandi. Uning ilmiy rahbarligida A.Axronqulov nomzodlik, A.Qosimov doktorlik dissertatsiyasini muvaffaqiyat bilan himoya qildilar. Hozir kafedrada faoliyat ko‘rsatayotgan 4 nafar fan doktori, ikkita fan nomzodi bevosita undan yo‘l - yo‘riq va ilmiy maslahatlar olishganidan minnatdordirlar. Umrining 40 yilini ilmga, yaxshilikka, tinimsiz mehnat va izlanishga, oilasiga, do‘stlar xizmatiga bag‘ishlagan filologiya fanlari doktori, professor Bahodirjon Sarimsoqov 2007 yil 15 avgustda vafot etdi.
